LMC inthlanah vote 74.26% a tla

Lunglei Municipal Council (LMC) inthlanpui hmasa ber March 29, Nilainia neiha vote thlâkah vote tla zat hriat chian theih a ni tawh a, vote tla zat 74.26% a ni. Vote tlate chu April 3, Thawhṭanniah chhiar a ni ang.

LMC-ah hian voter 40,548 awmin, mipa 19,123 leh hmeichhia 21,425 an ni a, voter 40,548 zinga 29,840-in vote an thlak a, vote 73.59% a tla a ni. Postal ballot hmanga vote thlâkte nen vote tla zat chu 30,111 a ni a, vote tla percentage 74.26% a tling.

Vote thlâktu mi 29,840-te chu mipa 13,906 leh hmeichhia 15,934 an ni a; mipa vote nei zinga 72.72%-in vote an thlâk a, hmeichhia vote nei zinga 74.37%-in vote an thlâk a ni.

Ward tinah vote tla 70% chung lam vek a ni a; vote tlâk ṭhatna ber ward, ward no. 11 (Zobawk leh Lungpuizawl)-ah 80.62% a tla a, vote tlâk chhiatna ber ward no. 7 (Chanmari)-ah 70.14% a tla thung.

Polling station mala vote tlâk ṭhatna ber Lungpuizawl (ward no. 11)-ah voter 434 zinga 381-in vote an thlâk a, 87.79% a tling. Vote tlak chhiatna ber ward no. 4-a Venglai-I PS-ah voter 963 zinga 625 (64.90%)-in vote an thlâk a ni.