MoS-in sum awlsam hnualsuat turin a chah

Tuipuiral Group YMA chuan nimin khan Lianpui khuaa Suakliana Hall-ah conference vawi 45-na an hmang a, minister of state TJ Lalnuntluanga'n hmanpuiin, sum awlsam leh dan loa thil tih pawisak lohnate hnualsuat turin a chah.

TJ Lalnuntluanga chuan, "Hmabak êng tak kan nei a, ngaihtuahna dik leh zîktluak tak kan neih hmasak phawt chuan kan ram hian hmasawnna nasa tak a nei thei dawn a ni," a ti a; mahni dinhmun mila awm thiam tur te, neih tâwka lungawi thiam tur te, ngaihtuahna dik leh hrisel, taimakna leh rinawmnate nunpui a, sum awlsam leh dan loa thil tih pawisak lohnate hnualsuat turin YMA member-te a chah a ni.

Tuipuiral Group YMA-in an huam chhunga Zopui tlang, Ṭàn tlang leh Lurh tlanga nungcha leh thing leh mau awmte humhalhna tura hmalakna tur a hnena an thlente chu en zui a tum thu sawiin Minister chuan, "Thawhhona ṭha a awm phawt chuan hmasawnna dik a awm thei ṭhin. Biodiversity Management Committee kalpui dante ennawn leh awmze nei zawka kalpui a nih theih nana ṭan lâk tum a ni," a ti.

Inkhawmpuiah hian ramngaw leh nungcha humhalhnaa YMA branch ti ṭhate hnenah lawmman sem a ni a; pakhatna Leisenzo Branch, pahnihna Khawbung Branch leh Bungzung Branch YMA, pathumna Khuangthing Branch YMA an ni. Bialtu MLA Ramthanmawia pawhin thu a sawi a, hruaitu thar an thlang bawk.

Tuipuiral Group YMA-ah hian branch 23 an awm a, member 12,585 an awm mek a, mipa 6,598 leh hmeichhia 5,686 an ni.