Chawngtlai lal Nikuala lungphun hawng

Chawngtlai khua chuan nimin khan haw rûnpui an hmang a, bialtui MLA leh deputy chief minister Tawnluia'n hmanpuiin, Chawngtlai lal Nikuala lungphun a hawng.

Deputy Chief Minister hian Chawngtlai Welfare Committee leh Mizo Historical Village Society buatsaih ‘Lal ropui Nikuala leh Chawngtlai khua’ tih lehkhabu leh souvenir ‘Chawngtlai Par’ a tlangzarh bawk a; Khawzawl bawrhsap CC Lalchhuangkima, additional DC Lalfakzuala, Mizo Historical Village Society, Chawngtlai Welfare Committee leh Nikuala thlah aiawhte'n thu an sawi bawk.

Tawnluia hian lungphun, souvenir leh haw rûnpui buatsaih nan Chawngtlai khawtlang hnenah Rs 10,00,000 a pe tawh a; nimin khan Nikuala lungphun bula Nikuala ro leh sûlhnute pho chhuahna tur ‘Nikuala Tungchaw’ sak chhunzawmna atan Rs 1,00,000 a pe leh a ni.

Chawngtlai khua hi February 21, 2014 khan Mizo Historical Village-ah puan a ni a, Mizorama khaw malkhaia Mizo pi leh pute sûlhnu awm tam bernate zinga mi a ni. Nikuala lungphun hi ft. 28-a sang, kil thum neia siam a ni a, a kil thumahte chuan Nikuala chanchin ziah a ni.