Hnam dang dan loa sumdawngte dap chhuak turin thawhho an rél

Mizo Zirlai Pawl, Muslim Welfare Society Mizoram leh Central Mizoram Gorkha Youth Association (CMGYA) hruaitute chu nimin khan MZP Pisapuiah an ṭhukhawm a, Mizorama hnam dang dan loa sumdawnna kalpuite dap chhuak turin thawhho an rél.

MZP tarlan danin, ṭhutkhawm hi MZP president Lalnunmawia Pautu-in a kaihruai a; Mizorama hnam dang dan loa sumdawnna kalpuite MZP-in dap chhuah a tum mek hi MWSM leh CMGYA hruaitute chuan ṭha an ti a, a ṭul angin MZP hmalakna ṭawiawma thlàwp ni se an ti a ni.

MZP chuan, tun hnaiah Mizoramah hnam dang dan loa sumdawnna kalpui an tam hle nia sawiin, "Mizo hming hawha sumdawnna bakah, state páwn aṭangin man tláwm tê tein phalna nei lote'n Mizoramah sumdawnna an kalpui nasa hle a, an bungrua an hralh zawh hunah an haw leh mai zel tih hriat a ni. Hei hi tualchhunga Mizo sumdawngte'n an tuar hle a, nghawng lian zawk a neih hmaa tihtawp a nih theih nan MZP chuan hmalak a tum a ni," an ti.