Lirthei tlan dan tur ruahman

Aizawl Traffic SP chuan Union Home Minister Amit Shah a rawn zin dawn avangin lirthei tlan dan turah thupek a chhuah.

Lirthei tlan dan tura ruahmanna siama kawngpui dunga lirthei chhia emaw bungrua emaw kawng dala awmte chu Traffic Control Room-ah (Ph No:0389-2322307/0389-2313061/ 9366553559) report tur tih an ni a, report lote chu hnuhsawn/dahsawn sak an ni dawn.

Thuampui Helipad to Raj Bhavan : Thuampui, Bawngkawn, Chaltlang, Chanmari, Zarkawt, Bazar Bungkawn (hospital road tiam in), Dawrpui, Treasury Square, Raj Bhavan huam chhung kawngpui dungah ni 1.4.2023 (Inrinni) zing dar 7 atanga tlai dar 6 inkar hian VVIP chetvelna tibahlah thei lirthei leh bungrua engmah dah phal a ni lo.

Traffic SP tarlan danin, khawchin hriat a nih loh avangin VVIP hi Lengpui Airport atangin AR Lammual/Vanapa Hall hi by road in a kal angai thei a, hei vang hian Lengpui to Raj Bhavan; Lengpui, Sihhmui, Sairang (Zero Point), Phunchawng, Rangvamual, Hunthar, Vaivakawn, Dawrpui Vengthar, Dinthar, Tuikual North, Tuikual South, Venghlui huam chhung kawngpui dungah Zing dar 7:00 atanga Tlai dar 6:00 inkar hian VVIP chetvelna tibahlah thei lirthei leh bungrua dah khap tlat a ni.

Ni 1.4.2023 (Inrinni)-a Union Home Minister chetvelna tibahlah thei thil; kawngpui dungahte hian a awm tur a ni lo tih tarlangin Traffic SP chuan, 'Lirtheia veivakte’n hriat lohna avanga buaina kan tawh lohna tur leh tul loa hun an sen thlawn loh nan lo inhmakhuaa, pumpelh dan kawng zawng tur a ni. Tluang taka Union Home Minister a vei vah theih nan lirtheite pawh nidang aia rei din a ngai dawn tih kan inhriattir nghal a ni,' a ti.