Dâwt hnualsuat turin RRR-a'n zirlaite fuih

Aizawl North College (ANC) chuan nimin khan Vanapa Hall-ah Annual College Week vawi 33-na khârna hun an hmang a, Sports & Youth Services minister Robert Romawia Royte-in a hmanpui. Minister chuan, zirlaite chu ngaihsan tur dik tak ngaisang a, sual huaa do ngam tur leh dâwt hnualsuat turin a fuih.

Robert Romawia Royte chuan, ṭhalaite ngaihsan zawng a danglam tial tial chu lawmawm a tih thu sawiin, "Ngaihsan tur dik tak ngaisang a, sual huaa do ngam leh dâwt hnualsuat ngam ni ang che u. Mahni thawh chhuaha hlawhtlinna rah a thlum bik a, retheihnate chu mi hlawhtlinga chher chhuaktu a ni fo," a ti a, ram leh hnam hmasawn nan mahni thawh chhuah ngeia din tum turin a chah.

Lehkha zir piah lamah rilru hriselna turin taksa sâwizawi a ṭul thu sawiin Minister chuan, "Infiamna hi mihring nuna bet tlat, sorkar pawhin a ngaih pawimawh a ni a, lehkha zirna atan pawh a pawimawh. Zirna leh infiamna hi a inkungkaih tlat a, New Education Policy, 2020-ah pawh infiamna tih thumal chu vawi 30 lai a inziak a ni," a ti a; hnam zahawm nihna turin mimal, chhungkua, khawtlang leh sorkar ṭanho a ṭul thu a sawi.

Robert Romawia chuan, Mizo ṭhalaite zu leh ruihhloin a tibuai nasa chu runthlak a tih thu a sawi a, "An thlan dik tâwk loh vang a ni a, duhthlanna dik lo thlan vanga thlen tur thleng phâk lo an tam hle. Thu dik leh dik tâwk lo thliar thiam a ṭul a, social media-a inziak narân leh mi thusawi chhàwn ringawt awih mai loin, a dik leh dik loh finfiah a pawimawh," a ti a; mi tana hriat tlak loh information petuah ṭang lo tur leh social media hmang sualtu ni lo turin zirlaite a chah bawk.