BJP-in Sushma Swaraj Award an hlàn

BJP State Mahila Morcha chuan nimin khan BJP pisaah Sushma Swaraj Award sem leh hlanna inkhawm an buatsaih a, hmeichhia 10 hnenah award an hlàn.

BJP tarlan danin, Sushma Swaraj Award-in a tum chu, sorkar laipuia External Affairs minister ni tawh Sushma Swaraj (L) hming a daih tawh loh nan leh a hnathawhte hriat rengna atan a ni a; India rama hmeichhia, eizawnna kawng hrang hranga hlawhtling leh hnathawhnaa mi chhuanawmte hnena pek tura tih a ni.

Award hlanna inkhawmah hian BJP, Mizoram Pradesh president Vanlalhmuaka chuan, Mizoramah G-20 meeting nghah a nih thu sawiin, "Kha khan a tum chu Mizoramah eizawnna leh tourism lama hmasawnna kan neih nan leh, vawiina Sushma Swaraj Award dawngtute ngei pawh kan kutthemthiamna hmangte hian chawi kàn kan la ni dawn a ni," a ti.

Vanlalhmuaka chuan, "Mizoram hian BJP kan hmuh dan dik lo hi kan thlâk a hun tawh a, bán sawm nei hmaa kûn tura ngaih tlatna Mizoteah hian a awm ni àwm a ni. Chutiang lam rêng rêng BJP-ah a awm ngai lo a, mi ṭhenkhat anga chal hnawih sen leh coconut sawh keh tak ngial pawh kan ti ngai lo," a ti a; BJP din chhan chu mi tin tana hmasawnna thlen leh mi tinin an mamawh leh chanvo an chan theihna tur pek a nih thu a sawi.

SUSHMA SWARAJ AWARD HLANTE

1. Dr Lalramzauvi, PHC, Lengpui

2. Dr Eileen Lalrinpuii, Director, 7th Day Hospital

3. Loisy Vanlalhmangaihi, enterpreneur (bakery)

4. Lalremsangi Fanai, social work

5. Kaphnuni, handicrafts

6. Ellcy Lalnunhlimi, handloom

7. Julie Lalrinzami, MJS, Additional District & Sessions judge; Kolasib Fast Track Court judge

8. Lalhmachhuani, Hreichuk, udhami farmer

9. Lalfamkimi, advocate

10. H Lalrinliani, Kanghmun, social service