Lirnghing dâwl zo in sak dan tur zirho

National Institute of Technology (NIT), Mizorama Civil Engineering department chuan nimin khan Hotel Recency-ah tlang rama in him leh tlo, lirnghingah pawh chhe mai lo tura in sak dan tur zirhona, 'Sustainable construction and earthquake resistant design of structures on hilly slopes' an buatsaih a, Higher & Technical Education minister Dr R Lalthangliana'n a hmanpui.

Zirhona hi April 5, 2023 thleng neih a ni dawn a; IIT Kharagpur, IIT Roorkee, NIT Mizoram, Thapar Institute of Engineering and Technology, Tata Steel (Tata Tiscon) leh Mizoram PWD mithiamte an tel. Sustainable construction, earthquake resistant design of structures on hilly slopes, modelling and analysis, seismic risk assessment, seismic fragility analysis, structural health monitoring, seismic hazard assessment tih thupuite an zirho a ni.

Dr R Lalthangliana chuan, Mizoram chu lirnghing nasa tak thlen theihna Seismic Zone-V a awm a nih thu sawiin, "Science thiamna hi sang hle mahse lirnghing erawh chu engtikah nge a thlen dawn tih an sawi lâwk thei lo. Chuvangin, lirnghing pawh lo thleng se, in tam tak chhe tur laka invên nan lirnghing dâwl zo in sak dan kan thiam a pawimawh. Lirnghing thlen tawhna ramte thlirin, in sak fimkhur lo leh ngheh lohnaah an tuar nasa a ni," a ti.