MPCC-in Rahul Gandhi thlavâng an hauh ; Democracy a tlûkchhiat a hlauhawm - Lalsawta

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute an kâwm a, Gujarat-a Surat District Court-in thiam loh a chantir Congress hruaitu Rahul Gandhi thlavâng an hauh. MPCC president Lalsawta chuan, BJP chêt dan avangin India ramah democracy a tlûkchhiat a hlauhawm thu a sawi.

Lalsawta chuan, Rahul Gandhi chu defamation case (intih­hming-chhiat thubuai) avangin kum 2 táng turin March 23, 2023 khan Surat Chief Judicial Magistrate-in thiam loh a chantir thu a sawi a, "Court-in judgement a puan aṭanga darkar 24 chhungin MP a nihna aṭanga bàn a ni. Rahul Gandhi hi ṭanpui a ngai a, party záwng ngawr ngawra en chi a ni lo," a ti.

BJP chu Hindu lal ram buatsaiha hmanhlelah puhin Lalsawta chuan, "Democracy ṭha takin awm thei se kan duh. Zalên taka sakhaw hrang hrangin kan Pathian ṭheuh kan biak pawh a chêp tial tial a ni," a ti a, ram dinhmun a hlauhawm thu a sawi.

Congress party President chuan, BJP-te'n Rahul Gandhi an beih chhan ngaihtuah chian a ṭul thu sawiin, "BJP-te'n India ram, Hindu lam rama siam an tum chu Rahul Gandhi hian a bei a, hetianga beitute chu an tana hlauhawm tur an siam zel a, bei ngam an awm tawh lo. Rahul Gandhi bak thu dik leh sakhaw tana ding ngam an awm tawh lo," a ti.

Kohhran leh mipui pawhin Rahul Gandhi chu AICC president a lo nih tawhna vang ni loin, a hma­lakna ngaihtuah se a duh thu sawiin Lalsawta chuan, "Democarcy kan nihna a derthâwng ṭan em tih ngaihtuah a ngai," a ti a; khua leh tuite'n freedom of speech (duh zawng sawi theihna tura zalenna) an neih a bo ṭan niin a sawi.

MPCC vice president Lal Than­zara chuan, Rahul Gandhi-a'n BJP thil tih dik lohte huaisen takin khawvel hriatah a puan ngam avangin BJP hoin tihmualpho an duh tih a sawi a, "Theihtawp chhuahin BJP-te'n an bei a, tihmualpho dan an zawng char char a ni," a ti.