Vawiinah Amit Shah a lo zin dawn

Vawiin hian Union Home minister Amit Shah chu Mizoramah lehlángin a rawn zin dawn a, Lammual aṭangin Mizorama project hrang hrang a hawn dawn bakah, project thar eng emaw zat lungphùm a phúm dawn.

Union Home Minister lo zin tur chungchangah Aizawl bawrhsap Dr Lalhriatzuali Ralte chuan ngenna thuchhuah a siam a; Aizawl mipuite chu an remchan anga Amit Shah lo làwma lo hmuak turin a sáwm.

Aizawl Bawrhsap chuan, Aizawl Head Post Office, Treasury Square aṭanga Raj Bhavan chhim lam gate inkar leh Tennis Court aṭanga Treasury bazar inkarah mi panga aia tam punkhawm leh bengchheng siam a khap a, "VVIP kalna tur kawng, Ṭhuampui Helipad leh Raj Bhavan inkarah mi tu mahin kawngpui hrûlah in sak hna an thawk tur a ni lo a, in sakna bungrua eng chi pawh an chhawp hnawk tur a ni lo," a ti.

Ruahman ang chuan Home Minister hi chawhnu dar 1-ah Leng­pui Airport a thleng dawn a, chawhnu dar 1:30-2:30 inkarah Lammualah hun a hmang ang a, tlai dar 4:20-ah Mizoram a chhuahsan ang.

Home Minister rawn zin tur chungchangah hian nimin khan chief minister Zoramthanga hoin sorkar official-te CMO conference hall-ah an ṭhukhawm a; in­buatsaihna hrang hrang­a mawhphurtu­te'n an hmalak dan an sawi.

Khawchin awm dan azira hun hmanna tur sawn theihna tur ruahmante ngaihthlaka tarlan a ni a, mawhphurtu department-te chu theihtawp chhuah tura hrilh an ni.