KHAWTHLIR
PUC-in thisen pe
Pachhunga University College NSS unit chuan Civil Hospital, Aizawl leh Synod Hospital blood bank-ah thisen unit 70 an pe. Civil Hospital, Aizawlah mipa 36 leh hmeichhia 20-in unit 56 an pe a, Synod Hospital-ah mipa 10 leh hmeichhia paliin unit 14 an pe a ni.
MIFCO nihphung thlak danglam
Mizoram Food Processing Industries Corporation Ltd (MIFCO) Board of Directors chu nimin khan an chairman Dr R Lalthangliana pisaah an ṭhukhawm. MIFCO chu sorkarin Mizoram Food Processing Agency (MIFPA) tia a thlak avangin April 1, 2023 aṭangin MIFPA tih hmingpuin hna an thawk tawh dawn a, ei tur sawngbawl lama hma latute kawng kawhhmuhtu atan hman a ni dawn tih tarlan a ni.
Mamit College Day
Mamit College chuan nimin khan an college hall-ah College Day vawi 40-na an hmang a, Mamit khawpui hmun hrang hrangah bawlhhlawhte thenfai hnatlang an huaihawt nghal. Mamit College hi April 1, 1983 khan khawtlang nu leh pa kal khawmin an din a, tunah hian NAAC grade B+ niin, thawktu 32 leh zirlai 160 an awm mek a ni.
Champion lawm
Hrangbana College chuan nimin khan an college Golden Hall-ah MZU Annual Sports Meet vawi 21-naa an champion an lawm a, Sports & Youth Services (SYS) minister Robert Romawia Royte-in a hmanpui.
Directory tlangzarh
Mizoram State Commission for Protection of Child Rights-in ‘Naupang dikna chanvo kaihhnawih inkaihhruaina (Child Rights Information & Resource Directory)' tih lehkhabu an buatsaih chu nimin khan Social Welfare minister Lalrinawma'n Police Headquarters hall-ah a tlangzarh.
Kolasib KVK tlawh
Agriculture director James Lalsiamliana chuan nimin khan KVK, Kolasib a tlawh a, KVK hmalakna hrang hrang a en. Director hnenah hian KVK Kolasib head Dr Michelle C Lallawmkimi'n powerpoint presentation hmangin an hmalakna leh hlawhtlinnate a hrilhfiah a; hmachhawp leh hmalak zel dan turte an sawiho a ni.
Zirtiri RSC-ah legal awareness
Mizoram State Legal Services Authority (MSLSA) chuan nimin khan Zirtiri Residential Science College, Durtlangah dan lam inzirtirna an buatsaih a, Gauhati High Court judge Justice Marli Vankung-in a hmanpui. Legal awareness programme hi Zirtiri RSC Legal Cell coordinator Lalrinsangi Nghinglova chuan a kaihruai a; resource person R Vanlalena, member secretary, MSLSA-in gender right chungchang a sawi a, Mizoram Bar Association general secretary R Lalremruata, advocate-in cyber crime chungchang a sawifiah bawk.