Pu Zoramthanga sorkarin sipai chhuahsan tur ram hi mimal pek a tum lo - Lalruatkima

MNF adviser Lalruatkima, minister chuan nimin khan Mizo Hnam Runa chhung inkhawmah thu a sawi a, Zoramthanga kaih-hruai sorkarin sipai chhuahsan tur ram chu mimal hnenah pek a tum lo hrim hrim niin a sawi.

Lalruatkima chuan, kum 2018 inthlanpuia MNF Manifesto no. 11-naah, 'Aizawl aṭangin sipai sawn chhuah a ni ang’ tih a awm thu sawiin, "Kan manifesto hi kan dinpui a, kan tihlawhtling zel. Pathian leh mipui zarah kan sorkar zel ang a, Pu Zoramthanga sorkar chuan sipai chhuahsan tur ram hi mimal hnenah pek a tum lo hrim hrim a ni," a ti.

Assam Rifles sawn chhuah chungchangah Congress leh MNF party duh dan a inang lo nia sawiin Lalruatkima chuan, "August 7, 1995 khan Congress president hlui leh khatih laia Chief Minister chuan, 'India ramah khawpui laili aṭanga sipai sawn chhuak ka la hre lo, chuvangin ka huphurh a ni,' tih a sawi. MNF chuan mipui kutah hlan kan tum," a ti a; AR ram chu Congress party-in mipui kuta hlan an hlau thung niin a sawi.

MNF Adviser chuan, Mizoram chu a la chhe vek lo a, a chhe ta vek anga sawitute'n lalna leh thuneih an châk luat vangin an sawi niin a sawi a, "Ram hruaitu kan neih tawh zawng zawngte hian ram tan theihtawp chhuahin an bei vek a, mahse, tun hmaa lian te, zaute leh ṭha kan tihte kha ram ṭhang zel leh changkang zelah a tâwk lo mai a ni. Insawisel ringawt hian ram a siam ṭha dawn lo," a ti.

ZPM chungchang sawiin Lalruatkima chuan, "Thereng ang an ni a, thâwm ring deuh an chhuah a, han man ila, tak a nei lo, hmeh sawm theihin a râwp vek a ni," a ti a, ZPM-te chu lalna leh thuneihna duha che buan buanah a puh.

Congress chungchangah, "Delhi-a an pisapui, Akbar Road-a mi khu a lûn tawh lo, maimawm rílin a bawh nual tawh mai thei," a ti bawk.