YMA group-te'n inkhawmpui an hmang

Nimin khan YMA Serlui Group, Langkaih Group leh Vantawng Group-te chuan conference an hmang.

Langkaih Group YMA chuan Bungṭhuamah conference an hmang a; khuallian bialtu MLA Lalrindika Ralte chuan khawthlang fate an namailo nia sawiin, "Thil tihna kawng tinréngah kan intodelh a, khuallian thlengin kan intodelh. USA leh Japan-ahte kan kal kher lo mai thei, mahse, he bial aṭang hian world class ngaihtuahna kan pu thei," a ti.

Lalrindika Ralte chuan, mi tinte chu Pathianin mi dang aia mi bik nihna a pe ṭheuh tih sawiin, "Kan ngaihtuahna a dik phawt chuan huphurhawm a awm lo a, zàmna chhan tur a awm lo. Thil awlsam a awm lo a, thil huphurhawm a awm lo," a ti a; hlawhtling turin huaisen leh rilru dik put a ṭul thu a sawi.

Serlui Group YMA chuan Saiphaiah conference an hmang a, hmanpuitu Lalrinsanga Ralte, bialtu MLA chuan, Serlui Group chhunga khuate chu a tam zawk ramri depa awm an nih thu sawiin, "Mizoram chhuahka leh luhka pawimawh a ni. Hnam dang hnaih taka khawsa kan nih avangin YMA kumpuan 'Ram leh hnam humhalh' bawhzuina leh tihhlawhtlinna kawngah kan pawimawh zual," a ti.

Lalrinsanga Ralte chuan, Serlui Group YMA chu ramri humhalhna tura thawh hlâwk berte zinga mi an nia sawiin, "Ramri humhalhna atana ṭha ber chu ramri khuate tihhmasawn a, development thlentir a ni," a ti a; Mizoram sorkarin ramri hmasawnna atan kawng hrang hranga hma a lak thu a sawi.

Vantawng Group YMA pawhin nimin khan Thenzawla Police Training School-ah conference vawi 25-na an hmang chhunzawm a, vantlang inkhawm neih a nih bakah, YMA branch hrang hrangte lengkhawm zai leh Mizo hnam làm hmanga intihsiakna buatsaih a ni.

Vantawng Group inkhawmpuia khuallian J Malsawmzuala Vanchhawng, Mizoram State Commission for Child Rights member chuan, naupangte enkawl kawngah ṭan lak nasat a ṭul thu sawiin, "Chhungkuaa seilen hi naupang zawng zawng chanvo bulthûm a ni. Home-ah dah luh ngai an awm lohna turin nu leh pa, pi leh pu leh an laina hnaite'n Zo nun ze mawiin a ken tel, naupangte enkawl puitlin kawnga kan mawhphurhna kan hriat thar leh ṭheuh a ṭul," a ti.

J Malsawmzuala Vanchhawng chuan, mi ṭhenkhatin Mizoram chu chhe em em tawh, ṭhalaite pawh lak tlak loh leh ruihhlo vanga buai em em angin an sawi fo thu a sawi a, "A tak takah chuan ṭhian chhan thih ngam ṭhalai rual tam tak, khawtlang tana mi ṭangkai khaw tin leh veng tinah an la tam em em a ni," a ti a; a chhe lai ringawt inhrilh tam lutuk chu Mizo hnam kal zel turah a ṭhat loh theih thu a sawi.