Mipa taka ram kaihruai ngam CM kan mamawh - Vanlalhmuaka

Mizoram BJP chuan nimin khan an pisa-ah political session an hmang a, an president Vanlalhmuaka chuan Mizoramin mipa taka ram kaihruai ngam chief minister a mamawh thu a sawi.

Vanlalhmuaka chuan Mizoramin a mamawh ber chu chief minister ṭha, mahnia thuthlukna siam thei a nih thu sawiin, "Mipa taka ram kaihruai ngam kan mamawh a ni. Khawvel ram hrang hrangten an ram hmasawnna atan enge an mamawh kan tih chuan Prime Minister leh President ṭha a ni. India ramah Chief Minister nei ṭha apiangin hma an sawn," a ti.

Mizoramin hmasawnna ṭha a neihna turin Mizoram BJP chuan hma an la mek nia sawiin MBJP President chuan, "India ram pawhin Narendra Modi mi huaisen corruption do ngam kan neih avangin hmasawnna chu khawvel hriat khawpin a thleng tawh," a ti a, Mizoram pawhin CM atan mipa dik tak, mahnia thuthlukna siam thei leh hmathlir mumal tak nei a neih a ngaih thu a sawi.

Vanlalhmuaka chuan, tunlai hian Assam Rifles insawn chhuah leh chhuah lohah inhnialna a tam hle nia sawiin, "AR sawn chhuak theitu tak tak chu BJP-te kan ni tih hi Mizoram mipuite hriatah ka sawi duh a ni. Sorkar lai MNF-ten AR insawn chhuah chungchanga inti thei taka an tlangauna hi anmahni tih a ni lo tih hrechiangtu chu MNF unaute hi an ni," a ti.

MBJP President chuan Union Home Minister lokal turin Mizoram tana hmasawnna hna thawh tur a rawn hawn tur zawng zawng chu cheng vbc. 2,414.027 chuang a nih thu sawiin, "Hei aia nasa zawk pawh hi MBJP chuan central-ah kan thlen zel dawn a ni," a ti a, MNF sorkar chu BJP tuhrah lo seng tum tawh lo tura a duh thu a sawi.

Mizoram BJP chuan nasa takin hma a sawn zel nia sawiin Vanlalhmuaka chuan, "LMC Election neih zawh takah pawh theih tawp kan chhuah. Party dangte anga sum leh pai sen tur kan nei lo chung pawha, Lunglei khawpui hmansawnna duhtu leh hmangaihtu candidate mi ṭha tak tak kan neih avang khan kan lawm hle. BJP candidate-te hi sum leh pai vanga BJP hminga ding tur ni tase, an inhnukdawk ngeiin a rinawm," a ti.