Amit Shah-a'n Vbc 2,098.97 senna tur project 6 lung a phum ; Union Home Minister-in Zokhawsanga Assam Rifles insawnna tur a hawng

Union Home minister Amit Shah chuan April 1, Inrinni khan Lammualah Zokhawsanga Assam Rifles battalion headquarters thar leh project dangte a hawng a, cheng vbc. 2,098.97 sènna tur project paruk lungphùm a phúm bawk. Amit Shah chuan inremna thuthlung (MoU) anga Aizawla Assam Rifle-te sawn chhuah an nih dawn thu a sawi.

Union Home Minister chuan, chief minister Zoramthanga leh Mizoram BJP-ten a hnenah Aizawla Assam Rifles awmte sawn chhuah a ṭulzia an thlen ṭhin tih a sawi a, "AR awmna hi Aizawl khawpui tan hmun pawimawh tak a ni. Ministry of Home Affairs, Mizoram sorkar leh Assam Rifles-te MoU angin AR-te hi an headquarters tharah kan sawn dawn," a ti.

Aizawla Assam Rifles hmun chu Aizawl khawpui tana hmun pawimawh tak a nih angin, Mizo mipui tan ṭangkai taka hman a nih tur thu Amit Shah hian a sawi a ni.

Home Minister chuan, prime minister Narendra Modi-a'n hmarchhak state a ngaih pawimawh thu sawiin, "Prime Minister a nih hnuah hmarchhakah vawi 53 a zin tawh, hetiang ang PM hi an la awm lo. Chu mai a ni lo, central minister-in ṭum 432 an tlawh tawh. Kan PM hian hmarchhak hmasawnna atan theihtawp chhuah a intiam tlat a ni," a ti.

PM Narendra Modi kaihhruai sorkar a pian hma chuan hmar­chhakah inkalpawhna a ṭha lo a, helna a tam tih sawiin Amit Shah chuan, "Hmasawnna a thleng mang lo. PM Modi kaihhruaina hnuaiah chuan hmarchhakin nasa takin hma a sawn a ni," a ti a; hmarchhak chu hel ho awm tawh lohna hmun, hmasawnna thlenna hmun ni tura ṭan lâk zel a nih thu a sawi.

Union Home Minister chuan, Mizoramin theihna tam tak a neih thu sawiin, "Hengte hi tihhmasawn kan duh. PM Modi kaihhruai hi Mizoram hmasawnna atan a intiam a, a ding a ni. Cheng vbc. 2,500 vel hû project ka hawng leh, lungphûm ka phúm hian central sorkar leh Mizoram sorkar hi mipui tan an ding tih a tilang," a ti.

Chief minister Zoramthanga pawhin thu sawiin, Union Home Minister-in Assam Rifles head­quarters thar a hawng chu lawmawm a tih thu a sawi a, "Mizo mipui tan ni chhinchhiah tlak a ni. Laldenga Cultural Centre sak tur pawh hi thil lawmawm tak a ni," a ti a; Laldenga Cultural Centre-ah hian mi 10,000 lenna hall siam a nih dawn thu a sawi.

Home minister Amit Shah hi Lengpui Airport-ah minister of state TJ Lalnuntluanga'n a lo dawng­sawng a, Ṭhuampui Helipad-ah Chief Minister leh sorkar hotu dangte'n an lo hmuak. Lammuala hun a hman zawhah Raj Bhavan-ah pawl hrang hrang hruaitute a kâwm a, Inrinni tlai khan Mizoram a chhuahsan a ni.