Amit Shah hun hmanna Lammual páwnah Congress party hruaitute an pung khawm

Mizoram Pradesh Congress Committee leh a hnuaia péng hrang hrang hruaitute chu April 1, Inrinni khan Union Home minister Amit Shah-a'n Lammuala hun a hman laiin Lammual páwn lam, gate bul velah an pung khawm a, Congress party hruaitu Rahul Gandhi chunga thil tih dan an duh lohzia an lantir.

Congress party hruaitute hi Rahul Gandhi chunga sorkar laipuia BJP sorkar thil tih dan duh lohna lantirin an au rual a, thuziakte an keng bawk a, "Rahul Gandhi thusawi avanga hetiang taka hremna a chunga lek a ni ta rum rum hi amah beih ngawr ngawr piah lamah, sumdawng Adani hum tumna a ni," an ti.

Rahul Gandhi-a’n Adani chungchang Parliament-a a sawi chhuah leh aṭanga ni kuanaah amah an puhna thubuai, defamation case tihnun leh nghal a ni tih tarlangin MPYCC chuan, "Parliament-ah hian Rahul leh Kharge thusawi nasa taka tihbuai a ni a, ṭum thum lai ngenna siam mahse BJP minister-te'n a thusawi tur an tihbuai bakah thusawina hun pek a ni lo," an ti a; Narendra Modi hian Adani inzawm dan Parliament-a sawi chhuah a duh loh vang niin an tarlang.