Kawlphetha man tihsan a ni dawn lo
Mizoram leh Manipur-a kawlphetha hman man bithliahtu Joint Electricity Regulatory Commission (JERC) for Mizoram & Manipur chuan kum 2023-24 atan Mizoramah kawlphetha hman man tisang lo turin thutlukna a siam.
Mizoram sorkar chuan JERC hnenah hian kum 2023-24 chhunga kawlphetha hman man (power tariff) tihsan a rawt a, tuna hman mek aṭanga 3.15%-a pun turin JERC-ah rawtna a thlen a ni. Chutih laiin, Mizoram sorkar rawtna hi mimal pakhat leh páwl pathumtin an dodal thu JERC-ah an thlen thung.
Kawlphetha man tihsan dilna chungchangah hian JERC chuan March 22, 2023 khan Aijal Club-ah sawi duh neite tana sawi theihna hun, public hearing an buatsaih a; mimal leh pawl aṭanga rawtna leh sawiselna thehlut pali an awm a, chu'ng zinga pathum leh Power & Electricity department-in an chhan-nate ngaihthlak a ni.
Power & Electricity department hian kum 2023-24 chhunga power supply enkawlna atana revenue sum mamawh (ARR) cheng vbc. 782.33 bituk turin JERC an dil. Cheng vbc. 782.33 hmu chhuak turin tuna power tariff hman lai chu 3.15%-a tihsan a, sum mamawh a tlin phak lohna la awm chu Mizoram sorkarin subsidy cheng vbc. 157.90 emaw, commission-in ARR a bituksak aṭanga 20.50% emaw, chumia a tlem zawk zawk hmangin phuhrûk a ni dawn tih PE department hotute chuan an sawi.
PE department-in an dil ang chuan khawlphetha hman man thar tur chu chawhrualin unit khatah Rs 8.08 vel a ni a; JERC-in PE department sum mamawhnate a zir chian hnuah ARR atan cheng vbc. 567.77 a bituk a, chu chu kawlphetha hralhna aṭanga hmuh chhuah tur a ni.
JERC chhût danin, tuna power tariff hman lai hmang leh electric vehicle (EV) charging station atana rate thar rawtna aṭangin kum thar 2023-24 chhungin cheng vbc. 406.85 leh kawlphetha hman bâng state páwna hralhna aṭangin cheng vbc. 62.62 hmuh beisei a ni a, a vaiin cheng vbc. 469.47 a tling.
Power & Electricity department-in kum 2023-24 chhunga an hmuh beisei vbc. 469.47 hian ARR atana bituk vbc. 567.77 chu cheng vbc. 98.30-in a pha lo a, a phâk lohna chu kawlphetha hman man tihsanna aṭanga phuhrûk tura ruahman a ni. Mahse, sum hmuhin ARR a phâk lohna chu state sorkarin subsidy cheng vbc. 98.30 pea a phuhrûk theih dawn avangin kawlphetha hman man tihsan a ṭul loah JERC chuan a ngai a ni.
JERC for Mizoram & Manipur tarlan danin, power tariff hman lai leh category thar (EV charging station) atana hman tur rate Mizoram sorkarin an rawt chu kum 2023-24 atan hmang turin thutlukna siam a ni bawk.