Joint NGO-in AR sawn thuai an duh thu Union Home Minister hnenah an thlen

Mizorama lehlánga rawn zin Union Home minister Amit Shah chu Inrinni tlai khan Raj Bhavan-ah NGO Coordination Committee (Joint NGO) hruaitute leh páwl dang ṭhenkhat hruaitute'n an kàwm. Joint NGO hruaitute chuan, Aizawl khawpui lailía awm Assam Rifles-te a rang thei ang bera sawn chhuah an duh thu an thlen.

Unon Home Minister hmutute hi Joint NGO hruaitute bakah, Muanna Veng Farming Cooperative Society Ltd, Mizoram State Cooperative Societies Coordination Committee hruaitute leh, Lai, Mara leh Chakna hnam aiawha hruaitute an ni a; pawl hrang hrangte chuan an duhte lehkhaa an thehluh bakah an sawipui nghal a ni.

NGO Coordination Committee chuan thuchhuah siamin, Amit Shah nen inkawmna hun ṭha tak an nei chu lawmawm an tih thu leh an thu thlente a hlawhtlin thuai an beisei thu an tarlang a, "Union Home Minister chuan thla hnih/thum chhunga sorkar nena inremna anga an chhuah tur thu a sawi," an ti.

Home minister Amit Shah hnenah hian Mizoram Underground Returnees Association, Cricket Association of Mizoram, Aizawl Mosque Committee leh Champhai District Import Export & Transport Union ten ziakin an mamawh te an thlen bawk.

NGO COORDINATION COMMITTEE THU THLEN
1. Kum 2018-a Union Home Minister-in Mizoram a rawn tlawh ṭuma ramri veng tura BSF Mizo battalion din tura a lo intiam tawh chu a hlawhtlinna hmuh an inbeisei thu leh bawhzui thuai turin an ngen.

2. Assam Rifles-te Aizawl aṭanga sawn chhuah tum chungchangah lawmthu an sawi a; AR-te a rang thei ang bera sawn chhuah an duh thu an thlen.

3. Mizoram ṭhenawm Myanmar leh Bangladesh aṭanga kan unau ráltlânte chungchang sawi lan a ni a, a theih ang anga ṭanpui turin an ngen.