KHAWTHLIR

Thisen pe

KṬP, Bawngkawn Pastor Bial chuan an bial silver jubilee pualin April 1, Inrinni khan Synod Hospital tan thisen unit 33 an pe a, petute mipa 24 leh hmeichhia pakua an ni. PYD (UPC NEI) pawhin Kolasib District Hospital tan Susan Downs School-ah thisen unit 37 an pe a, petute mipa 27 leh hmeichhia 10 an ni. Inrinni vêk khan ṬKP, Khumtung Pastor Bialin Serchhip District Hospital tan thisen unit 19 an pe a, petute mipa 16 leh hmeichhia pathum an ni.

Hma la zui turin sorkar ngen

PC party chuan Assam Rifles-te Aizawl khawpui laili aṭanga an insawnna tura ruahmanna kal mek nia lang chu hlawhtling taka hlen a nih theih nan chak taka hma la zui turin Mizoram sorkar an ngen. PC party chuan thuchhuah siamin, khawpui laili aṭanga AR sawn chhuah chu Brig. T Sailo kaihhruai PC sorkarin kum 30 liam taa an lo ruahman tawh niin an tarlang.

Zirlaite fanpui

Mizoram Samagra Shiksha bultumin tun hnai khan district hrang hranga pawl 9-11 inkar zirlai 280 chu Shillong khawpui fanpui an ni a; NEIGRIHMS, Indian Institute of Management, Don Bosco Museum, Umiam Lake leh Ward's Lake bakah, hmun pawimawh dangte tlawhpui an ni.

MLA-in pe

Hachhek bialtu MLA Lalrindika Ralte chuan April 1, Inrinni khan a bial chhung Zawlnuam khuaa Mizo Cement Worker Association hnenah cement mixer a pe a, mipuite tana a thiltih chu MLA tlin leh nan a tih loh thu sawiin, "Bial mipuite'n an tana thawk tura min thlan vanga ti ka ni. Ka MLA chhunga a ṭha thei ang bera bial tana hnathawh hi ka tum ber a ni," a ti. Cement mixer hi Rs 1,50,000 man a ni.

March 2023-ah Sample 52 endik

Thla liam ta March 2023 chhung khan Mizoramah swab sample 52 endik a ni a, Covid-19 vei mi panga hmuh chhuah a ni. Nimin thleng khan Mizoramah swab sample 19,93,562 endik a ni tawh a, Covid-19 positive 2,38,970 hmuh chhuah tawh a ni. Hripui vei zinga mi 726 (0.3%) an thi a, positive enkawl lai mi pakhat a awm mek a ni.