Dinhmunin chhiat lam a pan zel loh nan MNF sorkar kan hnâwl a ngai - Lalsawta

Mizoram Pradesh Congress Committee (MPCC) president Lalsawta chuan, mi dangte ṭhat lohna lai hlîr sawia politics khelh ṭha a tih loh thu leh state sum dinhmunin chhiat lam a pan zel loh nan MNF sorkar hnâwl a ngaih thu a sawi.

Lalsawta hian April 1, Inrinni khan BS Farm-a Aizawl South-I Block Conference a hmanpuinaah thu sawiin, "Mi dangte ṭhat lohna lai hlir sawi ringawta politics khelh hi ṭha ka ti lo. Party dang emaw, mi dang emaw ka sawichhe hman ngai lo a, ram tana kan thil tum hi sawi ila a pawimawh berin ka hria... Thil sâwt lo, ṭha bawk si loah chuan hun hmang lo ila a ṭha," a ti.

Mizoramah rethei ber leh hausa ber te, ṭhalaite leh mi zawng zawng tana sorkar ṭha siam an duh tih sawiin Lalsawta chuan, "Chutiang tur chuan koh hran kan ni. Mizoram hi siamṭhat theih a nih chuan Congress party hi siamṭha theitu tur kan ni. Tunah chuan sorkar lo awm leh turte tana harsatna thlen thei khawpin leibá kan ngah tawh a, chhiat lam kan pan zual zel loh nan sorkar lai hi kan hnâwl a ngai a ni," an ti a; sum pûk vak loa ram sum dinhmun siamṭhat a ṭul thu a sawi.

Congress sorkarin NLUP ṭanpuina Rs 1,00,000 pek an tiam chu an tipuitling tih sawiin MPCC President chuan, "Chhungkaw ṭhenkhatin hlawhtlinpui lo mahse chhungkaw tam tak chuan an dinchhuahpui a ni. Rs 3,00,000 pek min tiam laia Rs 25,000 sem nen chuan a inang lo hle. Mipui náwlpui dinhmun chawi sàn a, mi retheite dâwm kân hi Congress party hna pawimawh ber a ni," a ti.

Congress President chuan, America mite chuan ram hmangaihna tak tak nen zalenna (independence) an sual avangin a hun laia ram chak ber British sorkar an hneh thei tih a sawi a, Mizoram pawh ram hmangaihna tak tak nena enkawl a, mahni chhiat phah rak khawpa beih a nih phawt chuan siamṭhat theih a nih thu a sawi bawk.