Mizoram BJP-in lawmthu an sawi

BJP, Mizoram Pradesh chuan thuchhuah siamin, Union Home minister Amit Shah-a'n Mizoram hmasawnna tur a hawng thei hi lawmawm an tih thu sawiin, "Central BJP-in thlei bik nei miah loa rualkhai taka hmasawnna an kalpui hi a lawmawm kan ti hle a ni," an ti.

Mizoram BJP chuan, Narendra Modi kaihhruaina hnuaiah India ramin nasa takin hma an sâwn nia sawiin, "Khawvel hmuhsit ni ṭhin kha tunah chuan khawvel leader ṭhaa thlan chhuah PM kan nei ta hi BJP sorkar ropuizia lanna a ni," an ti a; BJP sorkar hnuaiah mi rethei leh mi hnuaihnung zawkte'n lei rem an rap thei a, hausa leh rethei kár zau lutuk tur an siamṭha niin an tarlang.

Mizorama chhungkaw tinin hmasawnna an neih theih nan MLA inthlanpui awm turah BJP sorkartir turin Mizoram BJP chuan mipui an ngen a, "BJP sorkarna state kan neih hunah kan beisei aia nasain hmarchhak state-te'n development an hâi luh ang kan ram milin kan la lut ve dawn a ni," an ti.

BJP, Mizoram Pradesh chuan, Mizoram hmasawnna tur lungphùm phùm a nih laia Congress party-te'n Rahul Gandhi thlavâng hauha kawng an lo zawh chu Mizoram mipui hmusitnaah an ngaih thu an tarlang bawk.