MRP chungchangah 2022 chhungin Legal Metrology-in complaint 1 dawng

Food, Civil Supplies and Consumer Affairs (FCSCA) department hnuaia Legal Metrology Joint Controller chuan kum 2022 chhung khan maximum retail price (MRP) aia sánga thil zawrh leh hralh chungchangah zualkona thu (complaint) pakhat chiah an dawng.

Vanglaini thu dawn danin, kum 2022 chhunga MRP aia toa thil hralh chungchang complaint lut chu edible oil leh packaged item-ah a ni. Complaint chu a bialtu Legal Metrology inspector-in bawhzuiin, MRP aia toa thil zawrhna hmun a tlawh a, MRP aia toa hralh chu dan phal loh a nih thu a hriattir bakah, MRP aia sanga hralh tawh lo turin hriattirna lehkha a pe a ni.

Legal Metrology hotute chuan, MRP aia toa thil zawrh leh hralhah bungraw phurh kualna senso (transportation cost) chu chhuan-lamah a tlin loh thu an sawi a, "Legal Metrology (Packaged Commo-dities) Rules, 2011 Clause 18(2)-in MRP aia toa hralh a phal lo," an ti.

Tarlan tawh angin, Legal Metrology chuan bungrua (pakaged commodity) rêng rêng MRP aia toa lei lo tur leh chutianga zuar an awm chuan Legal Metrology office, Hunthar Vengah emaw, district hrang hranga Legal Metrology office leh police station-ah emaw hriattir turin mipui an ngen a ni.