Amit Shah hun hmanaah zirlaite tel tura tih an ni; MPCC-in an dem

Union Home minister Amit Shah-a'n April 1, Inrinnia Lammuala hun a hmannaah Mizoram University leh Aizawla college tina zirlaite chu tel tura tih an ni a; chutianga titu MNF hruai Mizoram sorkar thil tih dan chu hriatthiam harsa an tih thu leh thil inhmeh lo taka an ngaih thu Congress party chuan an tarlang.

MZU-a Students Welfare dean Prof. Lalngurliana Sailo chuan MZU zirlaite Amit Shah-a programme-a tel tura hriattirna March 31, 2023 khan a chhuah a; Mizoram sorkara GAD secretary K Lalthawmmawia pawhin Aizawla college tina zirlaite chu Amit Shah-a programme-ah tel tura sàwmna March 31 khan a tichhuak bawk.

Union Home Minister hun hmannaa tel college zirlai ṭhenkhat chuan, an college thuneitute leh students union aṭangin zirlaite chu kal vek tura hriattir an nih thu leh a hmunah hming lam (roll call) tur a nih thu puanzar a nih thu an sawi.

Zirlaite tel tura hriattir leh ngen an nih chungchangah hian MPCC chuan, "Amit Shah programme-ah Aizawl khawpuia college zirlaite leh MZU zirlaite tel tura MNF sorkarin thuchhuah khauh tak a siam hi hriatthiam harsa kan ti a. India ram democracy lungphûm sâwi ṭhiat mektu BJP pachal Amit Shah programme-a tel tura thupek an ni hi thil inhmeh lo takah kan ngai," an ti.

MPCC chuan, MNF sorkarin ṭhahnemngai taka Amit Shah-a programme-a zirlaite tel tura thuchhuah a siam chu Central BJP leh MNF inmawng zawm nghehzia tilangtu niin an tarlang a, "Mizoramah MNF leh BJP-te hi inhaw àwm em emin lang ṭhin mah se, lang lo lam, Mizo mipui hmuh phâk lohah thûk takin an thawk dun tih a lang chiang hle," an ti a; MNF-te chu an lemchanna bànsan turin an chah a ni.

Lammuala Union Home Minister programme-ah hian sorkar hnathawk officer-te pawh tel tura hriattir an ni a, Mizoram sorkar officer-te tel an ṭhahnem hle a ni.