Minister-in YMA sport khârna a hmanpui

Minister Lalruatkima chuan April 1, Inrinni khan Joint YMA Multipurpose Hall, Vaivakawnah YMA branch pasarih telna - Aizawl West Joint YMA Sport khârna inkhawm a hmanpui a; dikna, rinawmna leh taimâkna chhawm nun zel a ngaih thu a sawi.

Lalruatkima chuan, YMA chu Mizo hnam venghimtu a nih thu a sawi a, "Kawng hrang hranga Mizo hnamin beih a tawh chuan YMA a pên chhuak ṭhin. Kan ram leh hnam ro hlu YMA a vul zel nan mi zawng zawngin ke kan pên a ngai a, zûk leh hmuam leh ruih theih thilah nula leh tlangvalte kan fihlim a ngai. Dikna, rinawmna leh taimakna kan chhawm nun zel a ngai a ni," a ti.

Mizoram chu a chhe ta vek anga sawi a ni fo chu ṭha lo a tih thu sawiin Minister chuan, "Mi ṭha leh rinawm tak tak ṭhahnem tak an la awm reng a ni tih kan hriat a ṭul," a ti bawk.

Aizawl West Joint YMA-ah hian YMA branch pasarih - Dawrpui Vengthar, Chawnpui, Dinthar, Hunthar Veng, Kanan Veng, Vaivakawn leh Zotlang an awm a; Joint YMA Sport-ah hian Kanan Branch an champion a ni.