Chawngtlaia Pipu Chhuahtlang hawn a ni

Chawngtlai khuain an khaw ram, Saibualpui hmuna Pipu Chhuahtlang an siam chu March 31, 2023 khan Legislative Assembly speaker Lalrinliana Sailo-in a hawng.

Pipu Chhuahtlang hawn pual hian Chawngtlai khua chuan March 29-31 chhung khan haw rûnpui an hmang nghal a, mi ṭhahnem tak an haw khawm a ni. Bialtu MLA Tawnluia, deputy chief minister-in Chawngtlai lal Nikuala hriatrengna lungphun a hawng a; Tawnluia hian Nikuala lungphun leh Pipu Chhuahtlang buatsaih nan Rs 10,00,000 a pe a ni.

Pipu Chhuahtlangah hian Mizo lal hmingthang leh huaisen 70, Mizo pasalṭha 40, pi leh pu hun aṭanga thawnthua mi hmingthang 30 leh British sipai Mizoram awptute lungphun 30 dah tura ruahman a ni a; a bul ṭan nan Zo hnahthlak lal hmingthang leh pasalṭha panga ve ve leh British laka zalenna atan beitute lungphun dah a ni.

Pipu Chhuahtlang lawmna inkhawm Nikuala Hall-a neihah Lalrinliana Sailo chuan, Chawngtlai khua chu khaw nuam, lal ropui, huaisen, rál rèl thiam, Zoram humtu tia chhàl ngam Nikuala leh a pasalṭhate khua a nih thu a sawi a, "Pi leh pute hun aṭanga khaw fing leh remhria, inlungrual an ni a, ṭhangtharte pawhin an hnung zuiin, mipui leh khawtlang ṭanrualna azarah Chawngtlai hi Mizo Historical Village tia hriat lâr a ni tawh a, Chawngtlai hmakhua a êng hle a ni," a ti.

Inkhawmah hian Nikuala tuchhuan zinga mi Rev. Lalthanliana pawhin thu a sawi a, Mizo Historical Village Society pisaa dah tur lehkhabu dahna (bookshelf) a pe. Chawngtlai khua hi pi-pu sûlhnu tamna a ni a, kum 2014 khan Mizo Historical Village-ah puan a ni.