ZPM-in LMC ward 11 an la vek

Lunglei Municipal Council (LMC) inthlanpui hmasa ber, March 29, 2023-a neiha vote tlate chu nimin khan Saikuti Hall-ah chhiar a ni a, ward awm zawng zawng, ward 11-ah Zoram Peoples' Movement (ZPM) party candidate-te thlan tlin niin, BJP, INC leh MNF candidate-te zingah tling an awm lo.

LMC inthlana vote tlate hi Saikuti Hall-a counting hall pahnih siamah chhiar a ni a, counting hall pahnihah vote chhiarna dawhkàn (counting table) 12 ve ve a awm. Vote chhiar ṭan hmain counting official-te awmna hmun tur pawh a ni a, chawhma dar 10-ah vote chhiar ṭan a ni.

State Election Commission (SEC) tarlan danin, LMC inthlanah hian ZPM candidate-te vote hmuh belh khawm chu 14,852 a ni a, MNF candidate mi 11-te vote hmuh belh khawm chu 8,858 a ni. Congress party candidate vote hmuh belh khawm chu 6,037 niin, BJP candidate mi pakuate vote hmuh belh khawm chu 226 a ni a; voter zingah vote duh bik nei loa None of the Above (NOTA) hmet mi 144 an awm bawk.

Candidate inhnehna sang ber chu Ward-8 a ni a, ZPM candidate Malsawmkimi Khawlhring-in amah hnaih bertu C Lalrindiki, MNF candidate chu vote 904-in a hneh. Inhnehna hniam ber chu Ward-4 a ni a, ZPM candidate R Lalramzauva'n amah hnaih bertu INC candidate Joseph Lalremngheta chu vote 109-in a hneh a ni.

Vote chhiarna hmun hi Lunglei municipal election officer leh bawrhsap Ramdinliani, district SP Rahul Alwal, election observer pahnih Dr Andrew H Vanlaldika leh Dr Lalngura Tlau, returning officer Donny Lalruatsanga leh M Misael ten an ṭhutchilh a; election official dang te, candidate-te leh an agent-te leh thuthar thehdarhtute an awm bawk.

Tarlan tawh angin, LMC inthlanpuiah hian candidate 42 an awm a; INC, ZPM leh MNF-te'n ward tin chuhin, candidate 11 ṭheuh an nei a, BJP-in candidate pakua an nei. Voter 40,548 awm zinga 30,112-in vote an thlak a, vote tla percentage chu 74.26 a ni.

LMC councillor atana thlan tlinte hnenah hian nimin chawhnu lam khan municipal election officer Ramdinliani'n thlan tlin an ni tih hriattirna, Certificate of Election a hlan nghal a ni.