ZPM President-in mipui beisei tithlàwn lo turin LMC councillor thlan tharte a chah

ZPM party chuan Lunglei Municipal Council inthlan zawh a ni ta leh an party an chak avangin nimin khan an party pisaah lawmthu sawi nan ṭawngṭai rualna hun an hmang. ZPM president Lalliansawta chuan, mipui beiseina tithlàwn lo turin LMC councillor thlan tharte leh party mi zawng zawng a chah.

Lalliansawta chuan, Pathian leh mipuite zarah ZPM-in hun chhin­chhiah tlak tak leh hun ropui tak an chang tih sawiin, lawmawm a tih thu leh ṭhahnemngai taka thawktute chungah a lawm thu a sawi a ni.

ZPM leader Lalduhoma chuan, Pathian leh Lunglei mipui chungah lawmthu sawiin, "ZPM-ah rinna in nghat ngam hi ka lawm em em. He inthlana kan chakna hi hlawhtlinna tluantlingah ka ngai lo a, hlawhtlinna dik tak zawk chu a tlingte hian hmasawnna hna an thawh hunah chauh a ni ang. He inthlanna hi chu a bul ṭanna chauh a ni," a ti a; ZPM sorkarna ni loin, Lunglei mipui sorkarna a nih dawn thu a sawi.

ZPM working president K Sapdanga pawhin lawmthu sawina tichhuakin, "Lunglei mipuite'n ZPM chungah rinna an nghat a, mipui khawngaihna zarah LMC inthlan hmasa berah hnehna kan chang thei hi a lawmawm tak zet. Lunglei mipui an rinawm, an thusawi chu vote hmangin a taka an lantir avangin kan lawm. Kan tih theih bakah Pathian a che a, mite thinlungah thu a sawi a, a chungah kan lawm tak zet a ni," a ti.

Nimina ZPM inkhawma thu sawitu dang Dr Vanlalthlana, MLA chuan, an dinhmun chu an thawh chhuah ni loin, thawhsaktu a awm vang a nih thu a sawi a, "Chapo thei kan ni lo a, inngaitlawm takin hma lam i pan zel ang u. Pathian lam en tlatin kal ila... Pathian malsawm tlâka hna kan thawh phawt chuan kan hmahruaitu hian kawng laklawhah min tàwpsan lo ang," a ti.

Dr Vanlalthlana chuan, ZPM chu an ṭha famkim lo tih sawiin, "A ṭha zawk beiseitute kal khawmin ZPM hi kan siam a ni ber. Kalphung thar - ṭhang lo thar zel tur tana belhfâkawm ni turin kan inbuatsaih mek. Ṭha famkim bik lo mah ila kan hma hruaitu hian hna min thawhsak zel. Mi beidawng kal khawm kan ni lo a, beiseina thar nei kal khawm kan ni," a ti a; Congress leh MNF sorkarte'n hmasawnna an thlen tawhte aia ṭha a awm theih an beisei thu a sawi.

ZPM-in chhuan tur an nei lo tih sawiin Vanlalthlana chuan, "Kan chhuan ber chu dikna, rinawmna, Pathian duh zawnga rorelna tun din a ni. Thawkrim ber, taima ber kan nih phawt chuan hei aia ram nuam, kan thlah kal zel tur tan chenna tlâkah he ram hi siam kan tum a ni," a ti.
ZPM Ṭhalai pawhin thuchhuah siamin, LMC-ah ZPM-in seat/ward zawng zawng an la vek chu Lunglei mipui kaltlanga Pathian malsawmna ZPM-in an dawn a nih thu an tarlang a, Pathian leh Lunglei mipui chungah an lawm thu an sawi.

LMC councillor thlan tharte duhsakna hlànin ZPM ṭhalaite chuan, "Ram leh hnam leh Lunglei khawpui tana ke an pênna turah mipui tana huaisen leh dik taka ding turin kan chah a ni," an ti.