LMC councillor atana thlante CM Zorama'n duhsakna a hlân

MNF president leh chief minister Zoramthanga chuan, mipuite'n an aiawh tur an duh ber an thlang ṭhin chu democracy ropuizia leh hlutzia tichiangtu a nih thu sawiin, Lunglei Municipal Council councillor tura thlan tlinte a lawmpui thu leh duhsakna a hlan thu a tarlang.

Zoramthanga hian nimin tlai khan Instagram-ah LMC inthlan zawh tak chungchang a tarlang a, "Party hrang hrangte'n candidate ṭha tak tak Lunglei mipuite tan kan thlang chhuak a, mipuite'n an aiawh tur an duh ber an lo thlang hi democracy ropuizia leh hlutzia tichiangtu a ni tih i hre nawn fo ang u," a ti.

Ram hmasawnna tura mawh­phurhna chang tharte a lawmpui thu sawiin Zoramthanga chuan, "Mizoram tan theihtawp chhuah zel turin ka ngen a che u," a ti a; candi­date tling zo lote chu hreh­awm ti lo a, mahni hmazawn ṭheuha Mizoram hmasawnna tura âwl loa thawk chhunzawm turin a sáwm.

MNF President chuan, LMC inthlan tluang taka Pathian zara zawh a ni chu a lawm thu a sawi a; inthlanna felfai taka huaihawt a nih theihna tura rim taka thawktu zawng zawng chungah lawmthu a sawi a ni.