Kan tlu a, chak turin kan tho leh ang - Lalsawta

Mizoram Pradesh Congress Committee (MPCC) chuan nimin khan Congress Bhavan, Aizawlah LMC inthlan result thlir lêtna hun an hmang. An president Lalsawta chuan, Lunglei Municipal Council inthlana an hlawhtlin lohnaah dem tur an awm loh thu sawiin, Congress party chu tlu mah se, chak tura an thawh leh dawn thu a sawi.

MPCC President chuan, LMC inthlannaah theihtawp an chhuah a, an hah tláng hle tih sawiin, "Chuti chung chuan kan hlawhtling zo ta lo a, hetah hian tu mah dem tur an awm lo. Pathian duh dan anga Mizorama thil a thlen theihna turin kan thawk zel dawn a, kan beidawng dawn lo a, kan phur sauh sauh zawk. Vawiinah hian kan tlu a, tlu hlen reng tur kan ni lo, chak turin kan tho leh ang," a ti.

Lalsawta chuan, "Tunah hnehna chang rih lo mah ila mipui rilruah sum leh pai hnâwl duhna thûk takin tuh a ni. Sum hmang tam tam chak tur ni se, MNF party candidate-te eng party mahin kan hneh a rinawm lo," a ti a; sum chakna hmachhuan loin an candidate-te'n theihtawp an chhuah thu leh an candidate-te chu an chhuan tak zet thu a sawi.

Congress President chuan, LMC-a sorkarna siamtu tur ZPM party a lawmpui thu sawiin, "LMC sorkar ṭha tak siam turin ZPM hi duhsakna ka hlan e," a ti.