KHAWTHLIR

Sa pêl rute man

Siaha police-te chuan tun hnai khan Kawlchaw bula Kawlawh lui kama ramsa pêla ramvâk mi paruk an man a, New Siaha East-II mi vek an ni. An hnen aṭangin ulhbun pathum leh airgun pakhat bakah, sakhi, savawm leh záwng sa te, savawm lu ruh leh sazuk ki pakhat ve ve man a ni a; Siaha Police Station-ah thubuai ziah luh a ni.

Governor leh BSF hotu inkâwm

Border Security Force (BSF)-a Mizoram, Cachar, Manipur leh Nagaland bialtu IGP thar Akhleshwar Singh chuan nimin khan Raj Bhavan-ah Governor Hari Babu Kambhampati a kâwm a, Mizorama BSF hnathawh leh a kaihhnawih thilte an sawi dûn. Larsap chuan, ramri venhimna uluk taka kalpui a ṭul thu leh tun hnaia Mizoram ṭhenawm vel boruak thlirin BSF-te'n theihtawp an chhuah chhunzawm a ṭul thu a sawi.

Ranvulh helpline

Ranvulh lama harsatna emaw, hriat chian duh emaw nei tana mi thiamte biakràwn theihna atan Animal Husbandry & Veterinary department chuan helpline number 1962 a siam thar. Helpline hi pisa kai hun chhungin biak theih a ni.

Minister-in hawng

Environment, Forest & Climate Change minister TJ Lalnuntluanga chuan nimin khan Kolasib Project Vengah Conservator of Forest, Northern Circle office leh quarters thar a hawng a; Bairabi-a Extension of Forest Rest House a hawng bawk.

Hmanrua hlân

MSU chuan nimin khan chief minister Zoramthanga hnenah Project-Mizoram (Humanitarian Aids Medical Equipment & Supplies), USA aṭanga damdawi hmanrua hrang hrang an dawnte an hlan. Hmanruate chu - hydraulic bed pakhat, face shield báwm 10, ballard adapter báwm li, wraps & pouches báwm hnih, medical cup báwm khat, isolation gown 150, scrub pant 40, disposable lab coat 82, surgical gown 14, operation theatre sheet báwm hnih leh N95 mask báwm 26 a ni.

MSSSB hotu kâwm

MZP Gen. Hqrs hruaitute chuan nimin khan Mizoram Subordinate Services Selection Board (MSSSB) chairman thar C Lalhuliana a pisaah an kâwm a; MSSSB hnuaia hna lakah thiamna inangah chuan ram leilung fate duhsak turin an ngen.

Kawng khâr dawn

PWD chuan Hunthar Veng lei tlahniam, B Sairengpuii (L) in bula Central Road péng thawm ṭhat hna an thawk dawn a, hei vang hian vawiin aṭanga April 8, 2023 thleng zan tin dar 8:30 aṭanga zing dar 2 thleng kawngpui khâr a ni dawn. Hnathawh tibuai thei tura lirthei leh bungrua dah phal a ni lo.

Vocational training chungchang sawiho

Mizoram Council for Vocational Training (MCVT) chu an chairman Lalchhan-dama Ralte, minister hoin nimin khan a pisaah an ṭhukhawm a; Mizoram sorkar aṭanga grant-in-aid fund atana cheng nuai 20 an hmuh ṭhin chu tihpun a nih theih nan hmalak an rêl.
Ṭhutkhawmah hian Mizoram sorkar hnuaia thiamthil kaihhnawih khawih department hrang hranga kalpui mek chu huang khata kaltir dan tur sawiho a ni a; department hrang hrangin skill training lama data an neihte chu LESDE department-in Skill Mizoram Portal a buatsaihah dah luh vek ni se, an ti.