Lengpui rama NIT, Mizoram campus tharah April 2023 chhungin forest clearance tihfel tum

Sorkar laipuia Environment, Forest and Climate Change minister Bhupender Yadav chuan, Lengpuia National Institute of Technology (NIT) campus dinna turah April 2023 chhung ngeiin forest clearance tihfel a nih tur thu Rajya Sabha MP K Vanlalvena a hrilh.

MP K Vanlalvena hian April 2, Pathianni khan Bhupender Yadav hi a chenna inah a kâwm a, NIT, Mizoram campus thar tur chungchanga harsatnate ṭawngka leh ziakin a thlen a ni.

Bhupender Yadav chuan, NIT-Mizoram campus chungchanga harsatna chu Mizoram EFCC minister TJ Lalnuntluanga leh Higher & Technical Education minister Dr R Lalthangliana te a sawipui tawh tih a sawi a, April 2023 chhung ngeiin forest clearance tihfel a nih tur thu MP Vena a lo hrilh. EFCC Secretary phone-in a be nghal a, NIT Mizoram harsatna sutkian chungchang ngaih pawimawh hmasak berah nei turin a hrilh nghal niin sorkar thuchhuahin a tarlang.

NIT-Mizoram hian Chaltlang leh Durtlangah mimal in an luah mek a; Lengpuia campus dinna tur hian January 2020 khan Union Cabinet meeting chuan cheng vbc 669.75 a pe (sanction) a ni.

NIT campus thar siamnaah cheng vbc 334.78 hman ral a ni tawh a, mahse, Mizoram Environment Forest & Climate Change department chuan Riverine Reserved Forest a ni, a tih avangin hna thawh kal lai zawng zawng tihtawp a ni. NIT, Mizoram hmunhma siamna tura tana sum hmuh tawh zingah la hman loh vbc. 334.97 a la awm.

Union EFCC Minister hmuh-naah hian MP K Vanlalvena hi NIT-Mizoram registrar Dr Lalthanchami Sailo-in a ṭawiàwm a ni.