Hnam dang pasala neih hi Mizo hnam phatsanna a ni - CYMA President

YMA, Buarpui Branch chuan nimin khan an branch kum 50-na, golden jubilee an lawm a, Central YMA president R Lalngheta'n a hmanpui a, hnam dang pasala neih chu Mizo hnam phatsanna niin a sawi.

Ram leh hnam humhalh chungchang sawiin R Lalngheta chuan, "Mizo nulate'n Mizo ngei pasal kan neih hi kan hnam humhalh nana pawimawh a ni a, Mizo ngei pasal neiha fa ṭhahnem zawk neih hi kan hnam tan a pawimawh. Hnam dang pasala kan neih chhan hi kan hmangaih vang pawh a ni lo a, sum leh pai kan duh vang niin a lang. Hnam dang pasala kan neih hian Mizo hnam kan phatsan a ni tih i hre thar ang u," a ti.

R Lalngheta chuan, khawvel hmun hrang hranga Mizote inpumkhata an awm theih nan CYMA-in hma a la mek tih sawiin, April 18, 2023 khian Lungleiah MTP leh CYLA-te nen hnam inpumkhat chungchang sawiho turin an inhmukhawm dawn tih a sawi.