Sainik School chungchang Minister sawipui

MZP General Headquarters hruaitute chuan an president Lalnunmawia Pautu hoin nimin khan School Education minister Lalchhandama Ralte a pisaah an hmu a, Sainik School, Chhingchhipa Mizoram zirlaite chungchang an thlen.

MZP hruaitute chuan, Sainik School-a lut zirlaite chu chhungkaw khata mi pawh ni se, a hautak avangin full scholarship an dawn theih nan dan dinglai awmte ennawna siamrem ngaite siamrem turin School Education minister an ngen. Naupang lut mek zingah unaua lut pawh an awm tih sawiin, "Chungte chu khawsak awlsam leh neinung an ni vek lo a, an innghahna full scholarship hi unaua an dawn theih loh avangin harsatna an tâwk mek a ni," an ti.

Dan hman laiah chuan, Sainik School-ah hian chhungkaw pakhat aṭangin zirlai pakhat bakin scholarship an dawn theih loh avangin, zirlai pakhat chu zirna chawlhsan turin inlâk chhuah a tum mek nia thu an dawn thu MZP chuan an tarlang a; an hriat theih chinah, state dangah chuan Sainik School-a zirlaite chu chhungkaw khat aṭanga zirlai pakhat aia tam an awm pawhin scholarship an pe vek niin an sawi bawk.

MZP ngenna chungchangah hian Education minister Lalchhandama Ralte chuan, a theih chinah a lo bawhzui tur thu leh, School Education department khawih theih bakah pawh thuneitu sang zawkah a lo thlen tur thu a lo hrilh niin MZP chuan an tarlang.