Ráltlânte lirthei che vêl endik dawn

Champhai District Committee on Myanmar Refugees chairman James Lalrinchhana, bawrhsap chuan, Village Committee on Myanmar Refugees (VCMR)-in phalna a pek ráltlân, Champhai district chhuahsan tur leh lut turte lirthei chu Mizoram Police leh Assam Rifles-te'n an endik dawn tih a tarlang.

James Lalrinchhana hian nimin khan Champhai district-a ráltlânte chungchanga inkaihhruaina thar a tichhuak a; Myanmar ráltlânte'n an awmna khua/veng khawtlang hruaitute hriatpuina loin an duh duhnaah an kal sawn ṭhin tih hriat a nih thu tarlangin, "VCMR-in permit a pekte chauhin an awmna khua/veng an sawn thei ang. Hemi kaihhnawiha district chhuahsan tur leh lut tur motor-te Police leh Assam Rifles-te'n an endik ang," a ti.

Champhai DC tarlan danin, ráltlan zawng zawngin an Myanmar ID card (mahpungtre) chu VCMR hnenah April 15, 2023 ral hmain an thehlut vek tur a ni a, VCMR-in an kawl ṭha ang. Dan leh thupek chungchangah, an awmna VCMR/ YMA-te'n uluk takin an vil tur a ni a; ráltlân zingah VCMR-in phalna a pekte chauhin dawr siam leh sumdawnna an khawihin an kalpui thei dawn a ni.