MNF-in kan chak loh kan pawm a, insiam ṭhat nan kan hmang ang - Lalruatkima
Mizoram sorkara rorel lai party MNF adviser Lalruatkima, minister chuan, Lunglei Municipal Council (LMC) inthlana an chak lo chu an pawm thu leh insiam ṭhat nan an hman dawn thu a sawi.
Lalruatkima hian LMC inthlan result puan a nih hnuah nimin khan Lungleia Mizo Hnam Rûna inkhawmah thu a sawi a, "MNF chuan kan chak lohna kan pawm a, insiam ṭhat nan kan hmang ang. Kan inen lêtna tur hmahruai a ni tih hi kan hotute'n an hria a, ngaihtuahna an hmang dawn a ni," a ti.
LMC inthlana chak ta ZPM party a lawmpui thu sawiin Lalruatkima chuan, "Lunglei mipuiin duh thlanna thiang takin vote an thlak a, result ṭha tak neitu ZPM-te MNF party chuan kan lawmpui tak zet a, Lunglei hmasawnna atan theihtawp an chhuah ang tih ka ring," a ti a; LMC councillor turte chu an mamawhte inthlahrung loa state sorkarah thlen zel turin a chah.
Lalruatkima chuan, MNF sorkarin Lunglei hmasawnna atan ṭawngka mai ni lo, a tak ngeiin an rawn thawk zel dawn niin a sawi a; Lunglei mipui chungah thuphá a chawi nawn leh tih sawiin, "He sorkar hian kawng hrang hrangin Lunglei mipui rilru kan tináin an duhkhawp kan tling lo tih kan hria a, ngaihtuahna thar nen hma thar kan la dawn a ni," a ti.
Lungleia Mizo Hnam Runa inkhawmah hian minister C Lalrinsanga leh MLA Lawmawma Tochhawng te pawhin thu an sawi a ni.
Nimin vêk khan MNF Gen.Hqrs chuan thuchhuah siamin, LMC inthlanpuia chak ZPM party an lawmpui tak zet thu leh candidate tling zo ta lote an tawrhpui thu an tarlang a, "Thlan tlinte Lunglei hmasawnna atan theihtawp chhuah turin kan beisei," an ti.
MNF party chuan, an party candidate-te vote petu zawng zawng chungah an lawm thu an sawi a; inthlan leh vote chhiar thlenga hah taka thawktu zawng zawng chungah an lawm tih an sawi bawk.
Councillor atana thlan chhuahte chu Lunglei hmasawnna atan Mizoram sorkarah hma la zel tura an beisei thu sawiin MNF chuan, "MNF sorkar Pu Zoramthanga kaihhruai hnuaia Lunglei hmasawnna tura hmalak tawh leh hmalâk mekte a hlawhtlin nana theihtawp chhuah turin kan ngen. Lunglei mipui tana innghahna tlakah LMC hi kalpui ngei ni se kan duh tak zet," an ti.