IGNOU Convocation vawi 36-na hman a ni; Mizoramah mi 1,082 hnenah degree hlân

Indira Gandhi National Open University (IGNOU) Regional Centre, Aizawl chuan nimin khan Dawrpui Multipurpose Hall-ah Convocation vawi 36-na hman niin, Mizoram bikah mi 1,082 hnenah degree hlan a ni a, chief information commissioner (CIC) Lalnunmawia Chuaungo-in a hmanpui.

IGNOU Convocation hi India ram pumah a ruala hman a ni a, IGNOU Headquarters, New Delhi-ah convocation pui ber neih a ni. IGNOU hian India ram pumah an zirlai 2,79,917 hnenah degree hrang hrang an hlan a; Mizoramah chuan master degree 408, bachelor degree 534, diploma 59 leh certificate 81, a vaiin zirlai 1,082 hnenah degree pek a ni.

CIC Lalnunmawia Chuaungo chuan, zirlaite chu sorkar hna ringawt ngaihven loa mahni kea din tum turin a fuih a, "Khawi sorkarah mah sorkar hna hian mi tin a daih séng lo a, ram hmasawnna tur chuan private sector-te tihlen a ngai. Tute pawhin mi dang aia thiam bik talent kan nei ṭheuh a, kan talent dawnte hmang ṭangkaia eizawnna siam tum hi hlawhtlin awlsamna a ni," a ti.

Sorkar hnain daih loh chin a neih laiin private sector chuan tàwp chin a nei lo tih sawiin Lalnunmawia chuan, "Ram a changkan poh leh private sector-ah eizawnna a pung zel dawn," a ti a; zirlaite chu Mizoram kalphung duangtu policy maker dinhmun luahtu ni lo mah se, a ṭha zawnga nawr kal theitu an ni tih inhre turin a chah bawk.

IGNOU regional director Dr SR Zonunthara'n IGNOU Aizawl Region Centre dinhmun tlangpui a sawi a; sorkar laipui duh dan angin thiamthil tihhmasawn (skill development) lamah ṭan an la a, Labour, Employment & Skill Development department nena thawk dunin Aizawl, Lunglei leh Siahaa ITI bakah, Pradhan Mantri Kaushal Kendra (PMKK) Aizawl leh Champhaiahte IGNOU-MSDE Centre chu din a nih thu a sawi.

Dr SR Zonunthara chuan, Higher & Technical Education department leh Mizoram University nena ṭanghoin National Training Programme kalpui a nih thu te, Civil Hospital Aizawl leh Mizoram College of Nursing-ah Learner’s Support Centre din a nih thu te, Mizorama college hrang hrangah Learner Support Centre an neih thute a sawi bawk.