Covid-19 donaa press mite rahbehna titàwp turin MJA-in Chief Secy an ngen

20th May, 2020

Mizoram Journalists' Association (MJA) Gen. Hqrs. hruaitute chuan nimin khan chief secretary Lalnunmawia Chuaungo chu a pisa conference room-ah an hmu a; India sorkarin press mite zalenna a pek chu Covid-19 hri léng kaihhnawihah rahbeh tumna awm nia an hriat thu leh chu chu ṭha lo an ti a, an duh loh thu an thlen.

MJA tarlan danin, May 11, 2020 khan Lunglei DC kaihhruaiin Border security Force (BSF) 60 Battalion leh 131 Battalion hotu te, YMA Sub-Hqrs Lunglei hruaitute leh Lunglei SP-te Lungleiah an ṭhukhawm a, Covid-19 chungchanga Indo-Bangla border (ramri)-a duty chungchang sawiho a ni.

Meeting thurel panganaah, 'YMA hruaitute'n an member, ramri hrúla duty-te an tlawh duh a nih chuan, a huam chhunga BSF Commandant an hrilhhre hmasa tur a ni a, hemi ang hian ruahmanna siam zui a ni ang,' tih a ni a; chutih laiin, thurel paruknaah, 'Media mite'n ramri hrúl an tlawh duh a nih chuan a huam chhung BSF Commandant hnen aṭangin phalna an la hmasa phawt tur a ni ang,' tih a ni thung.

Hetih lai hian, Covid-19 do chungchangah sorkar laipuia Ministry of Information & Broadcasting chuan March 23, 2020-ah state leh union territory sorkar tina chief secretary-te lehkha a thawn (vide No. E-36011/8/2020-BP&L) a; awareness atan leh chanchin thar dik leh rintlak mipuiin an hriat theih nan media-te'n zalên taka hna an thawh a, an duhna hmuna an kal a, an mamawh ang hmanrua an neih theihna atan a ṭul anga hma lâkpui turin a ti a ni.

MJA chuan, May 12, 2020 khan Lungleia MJA member-te'n press accreditation card awrh chungin Tiperraghat bula Tlabung Chawnpui Branch YMA duty-te tlawha thilpek hlan an tum chu BSF duty-te'n an lo dang a, an tum an tihlawhtling thei lo tih an tarlang.

Lunglei DC kaihhruai meeting-in media aiawh tel loa media mite chungchang an rél leh Freedom of the Press rahbehna thu an pass chu mak an tih thu MJA hruaitute chuan Chief Secretary an hrilh a, "Democracy rama hetianga Freedom of the Press rahbeh a ni hi a pawi a, kan dem tak zet. Democracy ramah transparency a awm tur a ni a, BSF-te hian engtik lai pawhin an hnathawhte media mite'n an hmuhpui an ngam turah kan ngai," an ti.

MJA tarlan danin, sorkarin media-te zalenna a pek rahbeh a nih chungchang leh MJA lungawi lohna chu May 14, 2020-a Chief Minister hoa Covid-19 lockdown kalpui zel dan tur inràwn khawmna, Assembly Conference Hall-a neihah MJA Gen.Hqrs. president Zonunsanga Khiangte-in a sawi chhuak. Inràwn khawmnaah vêk Chief Secretary chuan, Lunglei DC hoa media mite khuahkhirhna an lo siam chu an siamṭhattir tur thu a sawi.

MJA Gen.Hqrs. hruaitute chuan, press mite zalenna rahbehna chu Lunglei district leh Mizoram hmun dangah a thlen tawh loh nan te, Lunglei DC hoa May 11-a an thurel no. 6 chu paih a, siamṭhat a nih theih nan hma la tur leh, Indo-Bangla border area khawi lai pawh media mite'n tlawh an duh huna BSF-te'n an lo dan tawh loh nan hma la turin Chief Secretary an ngen a ni.

CS Lalnunmawia chuan, tihsual awm chu siamṭhat a nih tur thu leh a thlen nawn tawh loh nan a bawhzui tur thu MJA Gen.Hqrs. hruaitute hi a lo hrilh.