Maraland Chilli Powder tlangzarh

Siaha DC Bhupesh Chaudhary chuan nimin khan 'Maraland Organic Chilli Powder' a tlangzarh a; Tisopi Organic Aieng pawh tihchhuah thar leh a ni.

Bawrhsap chuan, "Zyhno tlangdung khuate hi hmarcha thakṭha chi thar hnem khua an ni a, hralhna a ṭhat vak loh avang leh a pho rona kháwlte a awm loh avangin kum khatah vawi khat chauh an thar ṭhin," a ti a; kut hnathawktute sum lak luh tipung tur leh kum khata vawi khat aia tam thartir dan ngaituahin a kaihhnawih department-te nen Chilli Powder Processing Plant din tura hmalak a nih thu a sawi.

Maraland Chilli Grower Association hi Zyhno, Ahmypi, Khopai, Siatlai, Chheihlu leh Laki khuaa hmarcha chíngtu mi 283-te din a ni a, self help group 25-ah an insiam a, khaw laili ber Zyhno-ah chilli processing plant bun a ni. Zyhno Chilli Powder Plant aṭang hian a vawi khat nan fûn 10,000 siam a ni a, Tisôpi-a aieng sawngbawlna Turmeric Processing Plant pawhin aieng fûn 10,000 vel an siam bawk.