Tangkhang hawte bus-a phurtute Veng ṭhenkhatah thinhrik an ni

Mizoram páwna Mizo tangkhang tun hnaia lo hawte Bairabi rél chawlhhmun aṭanga an district ṭheuha hruai tura Mizoram sorkarin bus a hman enkawltu (driver leh conductor) ṭhenkhat chu an awmna veng local task force (LTF)-te'n an thinhrik niin an sawi a; hei vang hian Aizawl City Bus Owner Association (ACBOA) chuan tangkhang lo hawte hruai tawh loh mai an duh.

ACBOA President chuan, an pawl member-te'n Mizoram páwn aṭanga tangkhang lo haw an phurh avangin veng ṭhenkhat task force-te'n an veng chhungah an thinhrik niin Vanglaini palai a hrilh a, "Kan ṭhukhawm a, hetiang zel a nih dawn a, driver leh conductor-te thinhrikna a awm dawn chuan lo thleng leh turte pawh phurh tawh loh mai kan duh; inthinhrikna awm hi ṭha kan ti lo," a ti.

ACBOA President chuan, lo hawte chu an Mizo puite an nih avangin city bus-te'n tlawmngaih chhuahin, kawng lakah chàwl khawmuang loin an phur a, sorkarin an hriselnate a endik vek hnuah an venga an lo thinhrik ṭhin chu ṭha lo an tih thu leh, sorkarin an invènna a siamsak vek avangin an hlauhawm loh thu a sawi.

Bus driver leh conductor-te'n Covid-19 kài an hlauh ve tho thu sawiin ACBOA President chuan, "Kai palh an hlau ve tho. Sorkar ruahmannain bus chhungah driver leh passenger-te an inkalpawh loh nan sarângin an ping phui vek a, an awmna hmun tur an thlen hnuah pawh lirthei leh an mahni taksate tihthianghlim (sanitise) vek a ni a, RAT hmanga endik vek an ni bawk," a ti.