Admission-a harsatna awm lo turin Class-XII exam buatsaih tum a ni
School Education minister Lalchhandama Ralte chuan, pawl 12 pass tharte tan college-a admission tih kawnga harsatna a awm lohna turin Higher Secondary School Leaving Certificate (HSSLC) Examination, 2020-a hmabak la neite tan exam buatsaih a nih tur thu a sawi.
Vanglaini palai zawhna chhangin Lalchhandama Ralte chuan, University Grant Commission (UGC)-in August 15, 2020 aṭangin college kal ṭan tura a tih thu a sawi a, "Class-XII pass tharte'n college-a admission an tih hman ngei theih nan exam hmabak la neite tan exam buatsaih tum a ni. A hun tur kan la ruat fel lo a, kan la sawiho dawn," a ti.
Covid-19 vangin inkhàrkhip puan a ni a, HSSLC exam mek tihtawp a ni. Zirlai ṭhenkhatin exam an zo hman a, subject ṭhenkhat erawh exam hman a ni lo. Exam zo hman lo an la awm avangin exam zo hman tawhte result pawh puan a la ni lo.
MBSE chuan inkhàrkhip thawh thumnaah exam hman lote tan exam buatsaih a tum a, mahse, Ministry of Home Affairs guideline nen a inkalh avangin
ṭhulh leh a ni.
Class-X pass tharte tana pawl 11 admission tih an la phal loh chhan zawhna chhangin Lalchhandama Ralte chuan, "State páwn aṭanga Mizote an rawn haw lai, fimkhur tura inzirtir nasat lai a nih avangin state leh district task force-te chuan admission tia punkhawm chu ṭha lo an ti a, hei vang hian admission tih khap rih a ni," a ti.
School Education Minister chuan, sikul ṭhenkhat chuan admission ti turin screening an ti a, ṭhenkhatah chuan admission tih tum mi 100 chuang an punkhawm theih thu sawiin, "Thingtlang lam admission ti turin an rawn kal a ngai bawk a, kan tunlai boruak nen a inmil lo a ni," a ti a; boruak thlir chungin admission tih hun hawn a nih tur thu a sawi.