Governor-in PWD hotute kawng a sawipui ; PWD-in cheng vbc. 2,554.98 hû National Highway an siam mek

Governor Dr Hari Babu Kambhampati chuan nimin khan Raj Bhawan-ah Mizoram PWD hotute koin, PWD hnathawh leh hmalaknate a sawipui. PWD hotute chuan, national highway leh a kaihhnawih hna panga, cheng vbc. 2,554.98 hû an thawh mek thu leh PMGSY hnuaiah project 351, kawng km. 4,482.732-a thui siam tura tih tawh a nih thu Larsap an hrilh.

Dr Hari Babu Kambhampati chuan, PWD hotute a koh chhan chu, hna hrang hrang an kalpui mek dinhmun hriat a duh vang a nih thu sawiin, "Hna a hun taka zawh loh a nih chhante leh harsatna in neihte hriat ka duh a, hengte hi ministry lamah kei pawhin thlen ka duh vang a ni," a ti. National highway leh Pradhan Mantri Gram Sadak Yojana (PMGSY) kaihhnawiha hnathawh dante an inhrilhfiah a ni.

PWD hotute tarlan danin, Mizoram PWD-in national highway leh a kaihhnawih hna panga an thawk mek a, chu'nga sum ruahman chu cheng vbc. 2,554.98 a ni. Hna pangate bakah, national highway siam tur hna thar pathum thawh ṭan tur an nei a, hna dang paruk pawh Ministry of Road Transport & Highways (MoRTH)-ah an thehlut mek bawk.

Hnathawh tur MoRTH-a an thehluh mek zinga mi, Tuivai luia lei dawh tur chu a pawimawh avangin MoRTH hotuteah a bawhzui tur thu Governor chuan a sawi. Governor chuan, Bairabi leh Sairang inkara rêl kawng siam meka rél chawlhhmun tur palite chu a bul hnaia khua awmte nen inkawlpawhna kawng sial a pawimawh thu leh hmalak thuai a pawimawh thu a sawi bawk.

PWD hotute sawi danin, Mizoramah kum 2000 aṭangin Pradhan Mantri Gram Sadak Yojana (PMGSY) thawh a ni a, phase 12 kalpui tawhah Mizoram pumah project 351 siam a ni tawh a, chu'ngte chu kawng km. 4,482.732-a thui siamna tur niin, sum hmuh (sanction) tawh zawng zawng chu cheng vbc. 2,840.08 a ni.

Project 351 zinga 300 chu thawh zawh tawh a ni a, project 51 thawh mek a ni. Kawng km. 4,482.732 siam turah km. 4,247.534-a thui siam zawh tawh a ni a, km. 277.735-a thui siam tur a la awm. PMGSY project-te katlangin Mizorama khua 232 zinga 216-in kawng a nei tawh.

Mizorama national highway sial tawh leh sial mek zawng zawng thui zawng chu km. 1,509 a ni a, chu'ng zinga km. 650 chu Mizoram PWD siam tawh leh hmalak mekte niin, a bak zawng chu NHIDCL-in an khawih thung. Mizorama national highway siam zinga thui ber chu NH-2 tia vuah tâk Seling-Tuipang (NH-54) leh Seling-Tuivai(NH-150) suih fin a ni a, km. 481-a thui a ni.