Kum 2023-24 atan sikul hawn ṭan a ni; Sorkar sikulah uniform inang hmang ṭan

Academic session 2023-24 atan nimin khan Mizoram pumah sikul hawn ṭan a ni a, sorkar sikulah chuan uniform inang hâk ṭan nghal a ni.

Hetih lai hian, sorkar sikula lut thar (pawl 1)-te chu zirlaibu tel loin thla hnih vel sikul kaitir an ni dawn.

Nimina sikul kài ṭannaah hian Mizoram sorkar ruahman angin sorkar sikulah chuan uniform inang hâk ṭan nghal a ni a; primary school-ah, middle school-ah, high school-ah leh higher secondary school-ahte uniform inang hman a ni.

School Education minister Lalchhandama Ralte chuan Vanglaini palai zawhna chhangin, "Thu kan dawn chinah chuan uniform thar hâk hi sikulte'n an zawm ṭha a, naupangte pawh an hlim hle. Amaherawhchu, puanṭhui lam indaih lohna avanga zirlai zawng zawngin uniform inang an hâk vek hman lohnate erawh chu a awm," a ti.

Lalchhandama Ralte chuan, New Education Policy (NEP) 2020 rawtna angin, sikul lut ṭan tir, pawl 1 zirlaite chu zirlaibu tel loin sikul kaitir an nih thu a sawi a, "Thla hnih/khat chhung chu zirlaibu tel loin sikul an kal dawn a, infiamna lam leh intihhlimna lam neihpui ṭhin an ni dawn," a ti a; ruahmanna chu naupang sikul kai ṭan tìrte'n sikul nuam an tih a, sikul kal an châk theihna tura tih a nih thu a sawi.