Kum 2025-26 aṭangin oil palm kûi ṭiah tur siam theih beisei a ni

Oil palm kûi ṭiah tur (sprouts) siamna hmun atana buatsaih West Serzawl rama Oil Palm Seed Garden chu nimin khan State Planning Board vice chairman H Rammawi-a'n a tlawh a, sorkar hnathawkte sum lak luh aia kut hnathawktute lak luh a tam hunah Mizoram a dinchhuah tur thu a sawi. Garden aṭang hian kum 2025-26 vel aṭangin oil palm kui ṭiah tur siam chhuah theih beisei a ni.

H Rammawi chuan, sorkar hnathawkte sum lak luh aia kut hnathawktute lak luh a tam hunah Mizoram a dinchhuah tur thu a sawi rualin, chumi tur chuan kalphung ṭha a ngaih thu a sawi a, "Kan system pawh a ṭha chho zel. Engkimah hlawhtling tur chuan taimak hmasak a ṭul," a ti.

H Rammawi chuan, oil palm kûi ṭiah tur chu duhtu an tam nia sawiin "India ramah pawh lei tur tun hma chuan a awm lo a, Costa Rica aṭangin kan chah ṭhin. Chah tur pawhin book lâwk a ngai ṭhin," a ti a; Mizoramah oil palm kui ṭiah a nih chuan India ram hmun hrang hrangah hralhna tur a tam dawn niin a sawi.

Planning Board Vice Chairman chuan, ei atana hman chi tél (edible oil)-ah India ram a intodelh loh avangin sorkar laipui a ṭang hle tih sawiin, "Hmarchhaka oil palm buaipuina atan ringawt cheng vbc. nuai khat a dah a ni. Oil palm man hi edible oil man pun dan azir zelin ennawn tur a ni," a ti.

Oil Palm Seed Garden enkawltu Agriculture department-a thawkte sawi danin, Garden chu ICAR hnuaia Indian Institute of Oil Palm Research puihnain kum 2013-ah kalpui ṭan a ni a, hectare 15-a zauah oil palm chìn niin, kung 1,989 a awm mek.

ICAR mithiamte chuan Oil Palm Seed Garden aṭangin kum khatah oil palm kûi ṭiah tur 8,00,000 vel thar theih an beisei a, chu chu tunlaia hralhna angin cheng nuai 320 man a ni.

Oil palm man hi tunah chuan sorkar laipuiin a bithliah tawh a, tun dinhmunah kg. khat Rs 10.56 a ni. Hetih lai hian, sorkar laipui vêkin kut hnathawktute oil palm kg. khatah Rs 13 aia tlem an hmu tur a ni lo, a ti a; company-te'n an leina tura a bituk Rs 10.56 bak zawng chu kut hnathawktute a pe dawn a ni.

Planning Board Vice Chairman chuan, MNF sorkar hmasak ṭumin Oil Palm Act siamin Mizoramah oil palm chìn ṭan a nih thu a sawi a, "Harsatna lian deuh kan neih chu MLA leh officer zingah pawh chíng duh an tam lutuk leh a chìnna tur hmun bik kan identify lo kha a ni. Hmun tam takah an chíng a, an suat leh mai mai," a ti.

Oil Palm Seed Garden tlawhnaah hian H Rammawi hi State Planning Board member Lalthansanga, Agriculture director James Lalsiamliana leh ICAR-a thawktute'n an ṭawiawm a ni.