KHAWTHLIR

Thisen pe

Govt Aizawl College NSS leh Red Ribbon Club chuan nimin khan an college-ah thisen pek an huaihawt a, mipa 113 leh hmeichhia 17-te'n Civil Hospital, Aizawl tan thisen unit 130 an pe. Kulikawn West Presbyterian Kohhran pawhin Good Friday pualin nimin khan Synod Hospital tan thisen unit 29 an pe a, petute mipa 21 leh hmeichhia pariat an ni.

Sahuan khâr dawn

Aizawl Zoological Park (Aizawl Sahuan) chu April 7, 8 leh 9 chhung hian thawm ṭhat a nih dawn avangin khâr a ni dawn a, mipui tan tlawh theih a ni dawn lo.

Minister-in hlàn

Home minister Lalchamliana chuan nimin khan Joint YMA Hall, Vaivakawnah Serchhip district-a YMA branch 28, Biate damdawi-in (CHC) leh, North Vanlaiphai, East Lungdar leh Khawlailung damdawi-in (PHC)-te hnenah oxygen concentrator 32 a hlân. Oxygen concentrator hi Formosa Foundation India-in an pek a ni.

MLA-in tlawh

MLA Dr L Thangmawia, MNF ṭhalai president chuan nimin khan a bial chhunga Kàwlbêm khua a tlawh a, Lunglei Municipal Council-a MNF an chak lo chu kumin kum tàwp lama MLA inthlanah an chak lo ang tihna a ni lo niin a sawi. L Thangmawia hian MNF-ah voter 62 a lawm lut niin MNF thuchhuah chuan a tarlang.

Darlawng H/S

Minister Lalrinawma chuan nimin khan a bial chhunga Dàrlawng khuaah khawtlang mipuiin sikul an din thar Darlawng High School a hawng. Darlawng H/S hi kumin 2023 session-ah ṭan nghal a ni a, kuminah pawl 9 zirlai 10 leh pawl 10 zirlai pasarih neiin bul an ṭan. Sikul atan BNRGSK in hman rih a ni.

Lungleiah MCC hlîp

State Election Commission chuan Lunglei Municipal Council inthlan zawh a nih tak avangin Model Code of Conduct puan chu hlih a nih thu a puang a; LMC inthlana thlan thlin mi 11-te hming leh an awmna party chu April 3, 2023 khan a tichhuak bawk.

EFCC dept hmalakna tlawh

Environment, Forest & Climate Change minister TJ Lalnuntluanga chuan nimin khan Champhai leh a chhehvela EFCC department hmalaknate a tlawh. Ramri kaltlanga nungcha tawlh rûk emaw, ram chhunga dan loa nungcha kawl leh tawlh mante dahna leh enkawlna tur Satellite Wildlife Rescue Centre dinna turin Tlangsam khaw bula EFCC department ram hectare 20 vela zau ruahman a ni a, sokar laipuiah project thehluh niin, thutlukna ngaihchân mek a nih thu tarlan a ni.