Kuhva hnah hmanga thlêng siamna hawng

Local Administration department (LAD) minister K Lalrinliana chuan, nimin khan Bilkhawthlir khuaah kuhva hnah hmanga thlêng siamna tur, Arecanut Leaf Plate Production Centre a hawng.

Arecanut Leaf Plate Production Centre hi Rashtriya Gram Swaraj Abhiyan kaltlanga hmuh cheng nuai 43 sénga sak a ni a; kuhva hnah hmangin thlêng (plate/bowl) chi ruk siam theih a ni.

K Lalrinliana chuan, kuhva hnah hmanga Bilkhawthlira thleng siam chhuahna hmun chuan intodelhna turin hmasawnna a thlen ngei a beisei thu a sawi a, "Mizoram sorkarin Food, Civil Supplies & Consumer Affairs department kaltlanga ram chhung ngeia thar buhfai lei tur a duh a, Bilkhawthlir khuain an thar buhfai quintal 23 chu sorkarin a lei tawh," a ti.

Vawi khat hman daih plastic tihtawpna atan leh Bilkhawthlir self help group member-te'n eizawnna ngêlnghet an neih theihna turin Arecanut Leaf Plate Production Centre chu hman tur a nih thu sawiin Minister chuan, "Tehfung hrang hrang leh a man chhiar chungchangahte ram dang siam el pha tura ṭan lak a pawimawh," a ti a; hlawhtlin tuma tih tak zetna leh tumruhna nena bei tak takte tan hna thawh sèn loh a awm thu a sawi.

Arecanut Leaf Plate Production Centre hawnnaah hian bialtu MLA Lalrinsanga Ralte, LAD director Rita Lalnunmawii Pachuau, joint director Lalchawimawia, Kolasib DLAO RC Lalzarzova leh Bilkhawthlir South VC president PC Laldinpuia te pawhin thu an sawi a ni.