CM a chêt chhuah ngam loh chuan CM nihna mi dang hlân turin ngen

Covid-19 hri léng vangin mipui, ram hrang hrang leh India rama state tin hruaitute an theih ang anga an buai em em laiin, Mizoram chief minister Zoramthanga erawh chuan Lengpui Airport a buaipui em em thung niin ZPM party chuan an sawi a; Mizoramin mipui thlamuan tura a che chhuak ngam lo a nih chuan CM nihna mi dang hnena hlàn mai turin an ngen.

Chief Minister chu state puma hotu ber a nih angin mipui thlamuantu tur a ni tih sawiin ZPM chuan, "Chutiang a nih laiin, Lengpui Airport-ah a kal tluk tluk hi a àwm lo hle a, mipui thlamuan turin pên chhuak se ZPM chuan a duhin a ngen a ni," an ti.

ZPM party chuan, ramrî-ah mi tlawmngai ṭhahnem takte'n chhùn leh zàn sawi loa an duty mek thu sawiin, "Ei leh in tur mumal pawh nei loin, thosi karah ni tin hun an hmang mek a, mi tlawmngai leh MLA ṭhenkhatte'n tlawhin ei tur leh an mamawh eng eng emaw an pek laiin, kan CM berin mipui leh ram tana ramria duty-te a la tlawh ve miah lo a, hmun hahdamah chauh hun a la hmang hian hruaitu nih a tlin lohzia a tilang chiang hle," an ti a; CM Zoramthanga chu pên chhuak a, mipui leh ramria duty-te thlamuan tura an duh thu an sawi.

CM Zoramthanga'n Lengte-ah ram zau tak neiin mau chî a kûi mek tih vantlangin an hriat thu sawiin ZPM chuan, "He a huan tlawh thup nan Lengpui Airport a tlawh ṭhin nge, ram mipui zawng zawng kan mangan laia Lengpui Airport siamṭhat a tlawh tlut tlut mai hi a thawktu engineer-te a ring zo lo em ni tih hi mipuiin hriat an chak hle a ni," an ti.

ZPM hian Chief Minister chu mipui leh ramria duty-te thlamuan turin mi dang kuta a dah mai lo a, amah ngeiin tlawh kual ve char char turin mipuiin an beisei hle tih hre turin an chah a; ram hruaitu ber a che chhuak ngam lo a nih chuan CM nihna mi dang kuta hlân mai turin an ngen bawk.

ZPM party chuan, tun hnaia Chennai aṭanga mi ṭhahnem tak an rawn haw chungchangah Tamil Nadu sorkar leh Chennai Mizo Welfare Association (CMWA) inpekna fakawm an tih thu an sawi a, "Central-in 85% a tum chunga kan lo tum ve tur 15% pawh kan state sorkarin a tum thei lo hi zahna chang hria se kan duh. Hetiang atan hian a ni dawn lo'm ni, sum tam limit awm loa hmanna tur chu," an ti.