CADC electoral roll tlangzarh

Kumina Chakma Autonomous District Council (CADC)-a member of district council (MDC) inthlanpuia hman tur electoral roll chu nimin khan Lawngtlai assistant district election officer leh additional DC Abraham Beirazi Khithie-a'n Chawngte SDO(C) conference hall-ah a tlangzarh.

Lawngtlai Assistant DEO hian CADC electoral roll chu political party aiawhte hnenah a hlan nghal a; fel taka inthlan kalpui a nih theih nan hmalak mek a nih thu sawiin, inthlan thianghlim, felfai leh muanawm an neih theih nan ṭha taka thawhpui turin political party-te a ngen.

CADC electoral roll thara a lan danin, CADC-ah hian voter 35,885 an awm a, mipa 18,208 leh hmeichhia 17,677 an ni a; draft roll aiin 587-in voter an pung. CADC-ah hian MDC bial 20-ah polling station 70 a awm a ni.