Gauhati High Court kum 75-na lawm

Gauhati High Court Aizawl Bench chuan nimin khan Aizawl District Court conference hall-ah 'Challenges and the way forward for the judiciary in Mizoram' tih thupui hmangin seminar an buatsaih a, Governor Dr Hari Babu Kambhampati-a'n hmanpui. Gauhati High Court chu kum 75-na platinum jubilee an lawm nghal.

Seminar hi GHC judge Justice Marli Vankung-i'n a kaihruai a, Governor-in Souvenir a tlangzarh. Larsap chuan, Mizote chu remna leh muanna ngaina mi an ni a, intihbuaina thubuai pawh a tam lo ṭhin tih a hriat thu a sawi a, "India ram judicial system-a siamṭhat ngai chu, kan beisei aia court-in thutlukna an siam muang ṭhin hi a ni," a ti.

GHC judge Justice Nelson Sailo chuan, judiciary-in hma a sawnna tura pawimawh hmasa chu infrastructure a nih thu a sawi.

Gauhati High Court hi April 5, 1948 khan din a ni a, GHC Aizawl Bench chu July 5, 1990-ah din a ni. Mizoramah judicial district pathum - Aizawl district (Aizawl, Kolasib, Mamit leh Saitual), Lunglei district (Lunglei, Lawngtlai, Siaha leh Hnahthial) leh Champhai district (Champhai leh Khawzawl) a awm mek.