Local council by-election neih tur sawiho a ni

Aizawl municipal election officer Dr Lalhriatzuali Ralte, bawrhsap hoin nimin khan SP conference hall-ah April 19, 2023-a Zemabawk, Durtlang Leitan leh ITI Veng local council by-election neih tur sawiho a ni a; sorkar official te, political party leh pawl aiawhte an tel. Bawrhsap chuan, rualbanlote'n vote an thlak theih nan hmalak a nih thu a sawi.

By-election neihna tur venga sorkar inah party flag tàr phal a ni lo a, mimal inah pawh in neitute phalna lâk hnuah chauh an tàr phal a ni. Political party-te'n pamphlet an sem a nih chuan an print tirna hmun leh address chiang taka tarlan tel tur a ni a; candidate-te'n lirthei hman phalna an dil chu an veivahna atan chauh niin, voter phurh nan hman phal a ni lo.