Lunglei by-pass road siamna tur cheng nuai 900 hmang zo tawh; by-pass road siamna tur buaipui mek a ni
Congress party-in sorkarna an chan lai, Lal Thanhawla chief minister a nih laia New Economic Development Programme (NEDP) hnuaia Lunglei by-pass road siamna tura sum dah cheng vbc. 9 chu hman zawh vek a ni tawh. Hetih lai hian, Lunglei by-pass road siamna tur Mizoram sorkarin a buaipui leh mek.
Lunglei by-pass road siamna atana NEDP hnuaia sum dah chungchang hi RTI Act tlawhchhanin Mizoram PWD-ah zawhfiah a ni a, PWD state public information officer (SPIO) Vanlalzuala Chenkual chuan March 28, 2023 khan chhanna a tichhuak a ni.
PWD SPIO chuan, Congress party sorkar laia Lunglei by-pass road siamna atan NEDP hnuaia sum dah zat zawhna chhángin, "NEDP hnuaiah hian cheng vbc. 9 dah a ni," a ti a, sumte chu Lunglei khaw chhung kawng hrang hrang siamṭhatna atan hman a nih thu a tarlang.
Lunglei by-pass road siamna tura sum dah cheng vbc. 9 aṭangin consultant rawih nan cheng nuai 20 hman a ni tih tarlangin PWD SPIO chuan, "Lunglei khaw chhung cheina ‘Improvement of Lunglei Town Roads’ atan Rs 8.80 lakhs chu hman a ni," a ti.
NEDP hnuaia Lunglei by-pass road siamna tura sum dah chu ‘Improvement of Lunglei Town Roads’ atan hman vek tawh a nih thu leh tunah sum hman bâng a awm tawh loh thu a tarlan a ni. Chutih laiin, 'Improvement of Lunglei Town Roads’ atan cheng nuai 8.80 hmang anga chhannaa tarlan a ni a; hemi chungchangah hi SPIO zawhfiah a ni a, nuai 8.80 tih chu tihsual palh a ni a, vbc. 8.80 tih tur a nih thu a sawi.
Document-a a lan danin, Lunglei by-pass road siamna atana cheng nuai 900 dah chungchangah hian September 2018-ah administrative approval leh expenditure sanction pek a ni a; chumi aṭanga Lunglei khawpui chhung kawng thawm ṭhatna atana cheng vbc. 880 hman phalna (approval of utilisation) chu November 25, 2022-ah pek a ni.
PWD SPIO chuan, Lunglei by-pass road siam tum a nih leh nih loh zawhna chhángin, "Lunglei by-pass tlâk lama kal tur hi concept paper siam a ni a, PM DeVINE 2023-24 hnuaiah thun turin proposal siam niin, concept paper hi central sorkarah submit a ni tawh," a ti.
SPIO chuan, Lunglei by-pass road chu PM DeVINE 2023-24 hnuaiah financial year 2023-24 chhungin ṭan beisei a nih thu a tarlan rualin, detailed project report (DPR) siam a la nih loh thu a tarlang bawk.
Lunglei by-pass road siam tum a nih chungchang hi sorkar hotu hrang hrang leh rorel lai MNF party-te'n kumin (2023)-ah an lo sawi/puangzar tawh a; PWD enkawltu chief minister Zoramthanga chuan February 8, 2023 khan Assembly session-ah sawiin, "Lunglei khawpui lirthei pung zel vanga traffic problem a ziaawm theihna atan khawpui hêlna tur by-pass road siam tum a ni. By-pass road siamna tur hian PM DeVINE aṭangin cheng vbc. 303.6 kum 2023-24 atan dil mek a ni," a ti.
SORKAR HOTU/MNF-IN AN SAWITE
▶ CM Zoramthanga: Lunglei by pass road atana cheng vbc. 10 dah khan a daih lo lutuk a, Lunglei khawpui tana hmasawnna turah hman a ni a. By pass road zawh felna daih tur chuan vbc. 330 vel a ngai a, chutiang daih tur project siam a ni tawh. (06.03.2023, Lunglei; MNF press release)
▶ Tawnluia: Lunglei by-pass road Congress sorkarin an tlâk dawn hnaih 2018 kum tàwpa a hming maia sum an dah pawh by-pass road siam nan a beitham lutuk avangin Lunglei tan tho hman a ni a. Lunglei by-pass road chu km. 22-a thui vbc. 300 velin ruahmanna siam thar a ni a. NHIDCL hnenah tender pek niin, an niin sum an zawng a. Ministry of Road Transport & Highway chuan DPR siam tur tender a rawn chhuah tawh nghe nghe. (24.03.2023, Mizo Hnam Rûn, Lunglei)
▶ MNYF: MNF sorkarin Lunglei by pass road, double lane ṭha zawka siamna tur project chu PM DeVINE scheme hnuaiah a thehlut fel tawh. Kum 2023-24 chhung hian Lunglei by-pass road siamna tur cheng vbc. 303.6 hi PM-DeVINE hnuai aṭangin Mizoram chuan a hmu leh ngei tura ngaih a ni. (MNYF press release 23.03.2023)
▶ MNYF: CM Pu Zoramthanga hmalakna avangin Lunglei by-pass road double lane ṭha zawka siamna tur tender pawh MoRTH hnuai aṭanga chhuah mek a ni. (25.03.2023)
▶ Dr R Lalthangliana: Lunglei by-pass road atan cheng vbc tam tak ruahmanna kan siam thar a, NHIDCL hnenah tender pek niin, nimin lawkah MoRTH chuan DPR siam tur tender a chhuah. (25.03.2023, Lunglei; MNF press release)